السبت، 28 مارس 2009

جنب الكشك


يسعد مساكم
العوافي يا جماعة
كل سنة وحضراتكم طيبين

فضيلتي قرر يطل عليكم بوجهه المشرق بما إنه معملهاش بقاله فترة, مما أدى إلى إن نفسية الجماهير بدأت تتعب وتشتاق لنفحاتي الروحية والفكرية , وتفضلاتي وتكرماتي والذي منه ومن اللي جنبه.
....

الحكاية وما فيها إني كنت معدّي من جنب كشك الواد مزمز

بصراحة حاجة تحسّر
طارق وماكسي وبشير ويوواي وحمادة وكوكو وروميو وسرنجة وأجوجو
دول شباب زي الورد جيراني, ساكنين جنب بعضنا منذ خشونة أظفارنا

زماااان
كان عندنا طقس من الطقوس الحياتية لحد دلوقتي مش عارف أيه المتعة اللي كنا بنلاقيها فيه..
كنا ننزل من بيتنا وناخد بعضنا ونروح نقعد جنب الكشك
تتفتح المشاريب والمآكيل ما بين البيبس والشيبس والشويبس اللايز والمولتو والمارلبورو وغيرها من طيبات الحياة الدنيا

القعدة ممكن تمتد لساعة, اتنين , تلاتة, سبعة, 13 ساعة قاعدين جنب الكشك
ييجي النهار والليل والفجر
والقعدة واحدة مش بتتغير

الأيام كانت بتعدّي ويأتي الهلال تلو الهلال تلو الهلال, والمساكيع ميقوموش من جنب الكشك
....

عدت الأيام وكل حي راح لحاله
دخلت الجامعة والدنيا اتغيرت
الاهتمامات اتغيرت والهموم اختلفت والمشاغل بقت غير المشاغل والصحاب غير الصحاب
عدت على أيام الكشك أكتر من 6 سنين
وعلى رأي السيناريست اللي بيكتب كل المسلسلات العربي...أييييييييييييييه دنيا

......

كنت مروح النهاردة
زي ما كنت مروح امبارح..عادي ما كل الناس بتروح كل يوم
عديت جنب الكشك

ياااااه
مش ممكن يا بشر
نفس القعدة ونفس المنظر ونفس الشبيبة
طارق وماكسي وبشير ويوواي وحمادة وكوكو وروميو وسرنجة وأجوجو
ونفس الجو بردو
المشاريب والمآكيل ما بين البيبس والشيبس والشويبس اللايز والمولتو والمارلبورو

يا نهار أبيض يا جدعان
بعيييييييد أوي
بعيد بعيد يعني

الناس ما اتغيرتش, الهموم ما اتغيرتش, الاهتمامات زي ما هي

إحساس عجيب التنين
وعلى رأي عبدو بن خلدون, هو انا اللي بعدت ولا هما اللي راحوا هناك لوحدهم؟؟؟

العمر عدّى كتير
وهمّا همّا

إحساس وحش أوي, أو خليني أقول إحساس غريب

العمر بيفوت يا جدعان, وانتوا لسة جنب الكشك؟؟؟
نفس الحاجات اللي كنا بنتكلم فيها من 17 سنة هي هي
أنواع العربيات وانواع الكلاب وأنواع السجاير والموبايلات ..............

مساء الفل يا كشك
هو انا ليه حاسس بغربة كدة بالرغم من إن الكشك خد مننا أيام وليالي
مش طايق المكان
مش عارف حاسس بالإشفاق ولا بالهمّ
بس اللي انا متأكد منه إن الدنيا اتغيرت كتير أوي عندي, وهما لسة قاعدين جنب مزمز

6 سنين
دخلت هندسة وسبتها واشتغلت في المسرح واتعلمت سيناريو وشلت 8 مواد وحولت إعلام وطلعت التاني عالدفعة وعشقتالسينما ودرست إخراج, واشتغلت في شركة وسبتها, وشفنا جوجو وهي بتتولد وبتكبر وبتحبي وبتنطلق, واتسجنت وخرجت من السجن, ونزلت السوق ولفيت واختي اتخطبت وفسخت واتخطبت تاني, وقريت قصص وروايات وكتب في الدين والسياسة والفن والسينما والأدب والفلسفة

6 سنين
الانتفاضة التانية بدأت وبوش بقى رئيس أمريكا ومبنى التجارة العالمي والبنتاجون اتنسفوا في 11 سبتمبر, والعراق وأفغانستان انضربوا واحتلوا, وحزب الله ورى الصهاينة الويل وحماس فازت في الانتخابات وغزة اتحاصرت وانضربت , ومصر حصل فيها انتخابات رئاسة, وأيمن نور اتسجن وكفاية ظهرت في الشارع المصري, والغد والوفد اتحرقوا, والإخوان اتحاكموا عسكريا واضراب 6 إبريل هز مصر, والشعب المصري بقى يخرج في احتجاجات كل صبح وليل بينادي بحقه في لقمة العيش وميا نضيفة

سمير خطب بنت بيحبها من زمان, وخالد اتخصص في دراسة الأديان, وعلي دخل حربية, ويحيى بقى ظابط شرطة, ويامن هيدخل الجامعة الأمريكية, وعمرو بقى بشمهندز, ومصعب نفض, وهيكل اتجوز مروة, والنجار راح غزة, وانا عرفت شلبي وصهيب وعبدالقوي واسامة وعبدالعزيز وحسن وعمر وسمر وريهان وأسماء وأماني وهبة ونهلة ومي ومنة وعبدالله ونور وعواد ومديحة وفاتن ومؤمن وسيف وسيد ود.سهير وصديق وتامر وسارة ونشوى وعادل....

الدنيا اتغيرت كتير ..كتير اوي
والكشك لسة زي ما هو...
ولله في خلقة شؤون


هناك 13 تعليقًا:

سمـــر مــاهر يقول...

واحده من أفضل التدوينات على المطبات

مي مدحت يقول...

فعلا ........

عاطف - هندسة يقول...

welcome back
يارفعت


وحشتنا يا راجل أنت وتدويناتك :)

امل يقول...

الدنيا زى ماهيا
احنا اللى بنتغير
مش عارفه فى كلامك شيء..احساس..زكرى
فى حاجه بتكلمنى ..بس مش قادره احدد هيا ايه
بس حسيت بالحزن
ان شاء الله اقرألك علطول

ماهيتاب اسلام يقول...

مشاء الله اسلوبك جميل
ربنا يوفقك
بس هى دى الحياه
وكل يوم بنشوف اللى كنا بنعمله واحنا صغيرين
نفس المشاهد.............

محمد هيكل يقول...

تدوينه دمها خفيف
فعلا الواحد لازم يفوق لنفسه ويعرف الأيام بتعدى فى ايه

شيف رخم يقول...
أزال المؤلف هذا التعليق.
شيف رخم يقول...

بجد فقرى وهتفضل طول عمرك فقرى بس
متهيالى ان قاعدة الكشك دى نوع من انواع الهروب زيها زى البلاى استيشن وقاعدة القهوة

شخص لا تعرفه اسمه شمس يكرة يقول...

أسلوب رائع بجد ده أولا
ثانيالما قرأت المطب ده قعدت افتكر اللي حصل في الست سنين الأخيرة إيه ده دنيا يا راجل دخلنا الجامعه واتخرجنا لينا دماغ مختلفة حاجات كتير أوي حصلت بس شايفه إني مش بس إحنا اللي اتغيرنا الدنيا كمان من حولينا اختلفت كتير على المستوى العالمي و المحلى وحتى الشخصي

ماهيتاب اسلام يقول...

انتوا ليكم جروب على الفيس بوك او ايميل ممكن اكلمكم عليه

محمد رفعت يقول...

قصدك إحنا مين؟؟

بتوع الكشك؟
:)

انا موجود عال
facebook

باسم:

محمد رفعت

بالعربي

قلم مشاغب يقول...

معاك أن الدنيا لعبة ...و ان حكاية الامتحان دى صعبة اوى فعلا،ولكن مش كل مرة هتخسر فى اللعبة هتخرج تكمل تانى ،هيجى وقت وتقول فيه تعبت ..كفاية ،ومش لازم يعنى أن الحياةتكون لعبة أو امتحان ...الحياة ممكن تكون هدف عايشين علشان نحققه ..ممكن تكون أمل الحياة هى الطريق اللى بيوصلنا ليه
و عموما الانسان فى حياته مش بيستمتع الابتحقيق الاحلام الصعبة ...لأن ما جاء سهلا ...يذهب سهلا

مكاتب التوظيف فى مصر يقول...

دهب أكثر الشركات تميزاً فى مجال توظيف العمالة المصرية بالخارج. لا تعطل عجلة النجاح بشركتك واتصل بشركة دهب لتوفر لك ما تريد. هدفنا هو مساعدتك فى النجاح المستمر لشركتك. نسعى للحصول على ثقتكم ونعمل بجهد لتوفير وقتكم. دهب ، أينما كنت نوفر لك ما تريد من أفضل الكفاءات المصرية.