الخميس، 19 أبريل، 2007

وأخدت القرار أخيرا

ما تعمل مدونة يا أبو رفعت..؟؟

كانت الكلمة دي كتير أوي بسمعها من اللى حواليا...كل العالم اللى ركبت الموجة وربنا فتح عليها وضربت مدونة على الشبكة العنكبوتية

كنت في الأول بسمع الكلمة واطلعها من الودن التانية...لحد ما بدأ الموضوع يشعشع في دماغي...
أه صحيح...طب وليه لأ؟؟
بس رجعت وانتكصت على عقبيّ...وقلت لأ...مش هعمل مدونة....بس برضه ليه لأ؟؟
أقولك أنا ليه لأ..
كنت بقول لنفسي...معنديش وقت...ومش فاضيلها...وبقول للي حواليا برضه الكلمتين دول...لكن هل فعلا ده كان السبب...
يعنى هل ولا مش هل (على رأي أبويا)؟؟
الصراحة انا لحد دلوقتي مش عارف
لكن
أكيد حتى لو موضوع الوقت ده كان صح...فهو مش السبب الوحيد...أو حتى مش السبب الأساسي

قد يكون السبب...إنى مش عارف أيه لازمتها يعنى إنى ابقى راجل بمدونة....وقد يكون برضه إن الموضوع ماكانش واضح قدامي..وممكن مثلا لأني مكنتش اتفرجت كتير على مدونات البيبولز علشان أفهم كويس أيه الموضوع


وقد يكون حاجة تانية خالص اللى أخرتني عن التدوين
وهي الفطرة والطبيعة المصرية فى الخوف من التغيير وخشية كل ما هو جديد
واللي نعرفه أحسن من اللي منعرفوش..(مع إن والله ثبت إن اللي منعرفوش أكييد أحسن.

المهم يا كباشن

إني أخيييرا أخدت القرار إنى أدخل هذا العالم المزدحم بالمدونين والمدونات..الإخوانيين والشيوعيات..والناصريين والملحدات..واللي ملهمش في البطيخ واللي ملهومشات...والفارغين والفارغات.......وإلخ

وبالفعل قلت أنا هبدأ أدوّن...لكن ما وصلتش لمرحلة إني أعمل مدونة..فقلت أفرش جنب واحد من أهل المدونات في المدونة بتاعته..ورحت أستأذنته..لكن على غير المتوقع..رفض هذا المدون المونجوبولّي طلبي شر رفضة
وأول ما ربنا فتح عليه بمساحة يبق فيها...نسي إخوانه فى الله,وسلّملي عالأخوة...ومن هنا بقوله...تبا ليك يا طموح إنت وجارك ابن خلدون

خسئتم


...............

مش هصدع دماغكوا كتيير بالمدونة العظيمة بتاعتي...

لكن هي فى الآخر مساحة يعبر فيها النفر عن أفكاره ورؤاه وتجاربه الذاتية ونظرته لما حوله وتنفيسا لما بداخله وفرقعة كتابية لأي حدا أنا متغاظ منه...خاصة لو مش عارف أقولهاله في وشه




وحاسب بقى أحسن في مطب في وشك





هناك 19 تعليقًا:

mostafa يقول...

مبروك عليك الدخول في عالم المدونات

بس حاسب على نفسك لحسن بيلموا القصيرين قصدي المدونين

عمرو طموح يقول...

يابن الذين
يا ضلالي
يا أفاق
يا كذاب

أنا رفضت؟؟؟

أنا قلتلك معنديش مانع أبعتلك الإنفيتيشن، بس نتكلم قبلها...

عارف كنت عاوز أكلمك في إيه؟ في أهمية التدوين، لأني زي ما شفت قبل كده كتير، ناس تستسهل إنها تضربلها مدونة، و بعد كده تنساها، لأنها كانت عاملاها من غير هدف...

بس يا قلة، و بعدين يا بني آدم مانا حتي لما شوفتك، كانت الأجواء لا تسمح بالكلام في مثل هذوها الموضوع... أنا أعملك ايه بقي؟

عموما ، كويس إنك خدت القرار، خليه معاك بقي، و حاسب لحسن حد ياخده منك

و سلام يا صاحبي

محمد رفعت يقول...

طموح

تبا ليك تاني

يلا مش مهم يقول...

الف مبروك يا محمد باشا رفعت
انا طبعا عارفك فحت بما انك عارفيني طحن
كلية اعلام وقبلها طب
ودماغ عالية وقهوة من الغالية
وبحب السيما ومغامر اخواني
كفاية كدة علشان تعرف اني عارفك
علي العموم مرحبا بيك كمدون
ومرحبا بيك كصديق
ونفسي اشوفك
ويللا مش مهم

محمد رفعت يقول...

يااااااااااااااه

أنا مبسوط جدا إنك عبرت اهلي يا ا/مجدي بن سعد
وفعلا انت طلعت عارفني فحت
مع إن فيه شوية معلومات من اللى قلتها غير دقيقة

بس عادى
من حقك برضه

صرخة الاقصى يقول...

مبروك الدخول في عالم المدونات

أبو نضال يقول...

ألف مبروك يا أبو رفعت و عقبال الأولاد إن شاء الله...أما نشوف إبداعاتك دى آخرها ايه؟؟

بس و الله فرحتلك اوى بالقرار اللى انت أخدته دا بس يا رب بقى تبقى اده!!!

و ابقى اعمل حسابك بعد كدا و انت نازل محاضرة العربى لحسن أكلمك و أقولك يلا بينا على اليكس

:)

محمد رفعت يقول...

جزاكم الله خيرا على تعلقاتكوا يا مينز & وومينز

الله يبارك فيكي يا صرخة الأقصى

وانت كمان يا أبو نضال

تبا ليك يا أخي
يا فلاح

أبو حنيــن السكندرى يقول...

الأخ محمد رفعت

مرحباً بك فى عالم التدوين

وإحنا مشتاقييين لبوستاتك العظيمة فى مدونتك العظيييمة دى على حد وصفك

بس أنا بنصحك بحاجة
أنك تحط لافتات توضيحية أمام مطباتك الصناعية
علشان انا خايف على العربية من المطبات المستخبية

زى اللى بتعملها البلدية
وفى الأخر الداخلية
تدفعك الغرامة اللى هية

يعنى خربانة خربانة

وسلام يا مان
أبو حنين السكندرى من إسكندرية
مستنى ردك عليه
ياللا باى
ومش عايز أشرب شاى

محمد رفعت يقول...

أبو حنين السكندري

إزيك يا حبي...عامل أيه؟؟

اسمك بيفكرني بأسماء الصحابة

نورتني يا باشا فى مدونتي المتواضعة

بعد ما دخلت انبهرت بمدونتك الراااااااائعة

بجد ما شاء الله ممتازة
.......

بس أيه يا راجل ده..

مش عايز تشرب شاي فى أول زيارة ليك كدة؟؟

تصدق عيب عليك

ده انت حتى اسكندراني ومجدع..وانا لسة راجع من عندكوا امبارح
....

مع إني عمرى ما قابلتك ولا كلمتك قبل كدة

ومعرفش أصلا إنت عرفت مدونتى منين

إلا إن غالبا من مدونة يلا مش مهم

بس متوقع نرشق فى صحوبية جامدة

وقبل الصحوبية أصلا
فى رابطة أقوى بكتير بتجمعنى معاك يا شقيق.

.......

كنت عايز أسألك صحيح؟؟

انت إزاى عامل إذاعة بتشتغل اتوماتيك مع فتح مدونتك؟؟

نهلة عبد الرحمن ،سمر ماهر يقول...

بسم الله الرحمن الرحيم
اللهم صلي على محمد وعلى آل محمد كما صليت على ابراهيم وعلى آل ابراهيم
السلام عليكم ورحمة الله وبركاته


ألف مبروك
وعلى فكرة اسم المدونة جميل
بس مش عارفة وصلتني رؤية مختلفة لما قرأت عنوان المدونة والصورة كمان
أنها مطبات صناعية قوية
احنا اللي بنعملها لأنفسنا
دائما بنضع أنفسنا في المطبات ونعقد الأمور
ونرجع نقول هي الدنيا اللي وحشة

(نعيب زماننا والعيب فينا!!!!!!!!)

نهلة محمود
والله ولي التوفيق

محمد رفعت يقول...

جزاكي الله خيرا يا نهلة

وتعليق جميل منك

شرفينا هنا على طول بقى إن شاء الله

هبة مدكور يقول...

السلام عليكم

رائع يامحمد ماشاء الله عليك انت ونهلة

ربنا يباركلكم ويساعدكم واشوفكم فى تقدم ان شاء الله

بس انا بتمنى او بطلب منك ان موضوعاتك تكون منوعة ياريت تكون فاهم قصدى

والف الف الف مبروك

سلاااااااااااام

محمد رفعت يقول...

الله يبارك فيكي يا هبة

ونورتينا فى المدونة

وفاهم قصدك

وإن شاء الله هعمل زي ما قلتي

بس انتى خليكي ضيفة دائمة هنا

safa7_karmooz يقول...

مبرووك المطب بتاعك

بس متتاخرش علينا واتحفنا بمطات اكتر

بس بالراحة للعفشة تتكسر :p

atef4all يقول...

محمد رفعت
حبيبي اللي واحشني أوي والله
باراوة عليك يا واله
هي دي البداية
شد حيلك بقي عايزين نشوفك اعلامي كبيير
وأوعي تنسي النية لاتروح في دهية

ربنا يوفقك ديما لما يحبه ويرضاه

وأنا والله بفكر ادخل عالم المدونات عما قريب إن شاء الله


وسلم لي علي عفريت الكوز

kimexlilo يقول...

بن رفعت

مبروك يا باشا

:D

محمد رفعت يقول...

عمي الكبير سفاح كرموز

صاحب الطرطشات والذي منه

نورت المدونة بطلعتك البهية يا باشا

وكان نفسي أعرف عنك أكتر...بس انت مش كاتب على مدونتك الجميلة أى معلومات عنك
ومن حقك تطرطش براحتك

ما هي لا باظت ولا خربت ولا جابت جاز
...........

عاطف..

حبيب القلبي الغالي

اللى قضيت معاه فترة قليلة لكن كانت كافية لارتباطي عاطفيا بيه بعنف.

نورتني يا عم فى مدونتى الصغيرة

وفى انتظار مدوناتك وإبداعاتك

reem يقول...

مبروووووووووووووووك يامحمد على المدونة

ربنا يوفقك

وان شاء الله المدونة تكون جميلة باذن الله