الجمعة، 1 يونيو 2007

ضربني بوشه على إيدي




مرة كنت ماشي في أحد شوارع القاهرة في أمان الله
وإذ فجأة مرة واحدة كدة
راح واحد راكب عجلة وجاي من ضهري راح

طاااااااااااااااااااااااااااااخ

خبط فيا راح ملبسني في عربية قدامى
المهم
فما كان مني إلا أن حاولت تمالك أعصابي ورحت باصصله بس
فراح قايلي كلمة عجيبة جدا
قاللي
"أيه يا عم...مش تبص وراك"
..............

أيه رأيكم؟؟

أظن برضه إن دي ثقافة مترسخة في عقول كتير مننا
عارفين ليه
لأن كتييير أوي من المطبات اللى بتقابلنا بنتعامل معاها بالطريقة دي
إننا نرمي الغلط على غيرنا
أو نشوف أي شماعة نعلق عليها الغلط, إلا شماعة تصرفاتنا إحنا
..................

السبب في فشلنا أو في عدم نجاحنا في كتير من الموضوع هو فلان أو فلان أو فلان ابن الــ..... اللى تسبب في انا مش عارف أيه كدة

واحد يقولك: فلان ده هو اللي سقطنى, أصله مرضاش يغششني ابن الـ
وفلان ده : هو اللى أخد مكاني في الشغل واترقى على قفايا
وفلانة دي هي اللى جابتني ورا
وهكذا
بيفكرني الموضوع ده بمسرحية "شاهد ماشفش حاجة
لما عادل إمام تجرأ وضرب بهاء على وشه
(هتلاقوا بهاء في الصورة فوق)
فأول لما عادل إمام ضربه بالقلم: إيديه وجعته وفضل ماسكها
وقعد يقول: ضربني بوشه على إيدي.
زي برضه الراجل اللى قتل واحد وقدام المحكمة راح قايل أنا مقتلتوش يا بيه
هو اللى بطنه جت في السكينة
......وخد من هذا الكلام بقى للصبح
ما علينا
تعليق الفشل على شماعات لا يمكن يوصلنا في يوم للنجاح
والتحجج بضيق الوقت وزحمة المكان ومكائد الآخرين وكثرة المعوقات مش بينفع
وأفضل طريقة لعبور أي مطب
هي التصرف معاه بإيجابية ومحاولة عبوره وتعلم الدرس المستفاد منه بدلا
وحتى لما تقع
حاول تقع لقدام...زي ما كانوا بيقولولنا في دورات القيادة والتخطيط
..........
أختم بموقف جامد كدة لازم يتقال في تدوينة زي دي
لما حبيبي عبده ابن خلدون خبطه –بعيد عنك وعن السامعين- ميكروباص
والسواق كان سايق على 90 وخبط عبده وهو بيعدي الشارع
لما جم يسألوا السواق إنت إزاي خبطه يا عم مكنتش شايفه ولا أيه؟؟
قالهم لأ كنت شايفه, بس انا قلت اكيد هيسرع وهو بيعدي الشارع بس هو اللى مسرعش.

هناك 22 تعليقًا:

فـــدوى يقول...

موقف مستفز جدا بتاع السواء ده فعلا
انا لو من اللي بيسأله ... !!

السكندرى يقول...

هههههههههههه
حاجة تخلى الواحد يجيلة السكر صراحة
بس مش غريب إن ده يحصل الأيام دى
اللى الصح فيها بيتقال عليه غلط
واللى الحرامى فيه بيتقاله يا باشا
واللى المحترم فيه بيتقاله يا بن ال ...
وحاجات كتير فى رأيى كانت سببا لإ رساء تللك الثقافة فى نفوسنا

sharkawoo يقول...

هو سواء المثال الأول أو الأخير أنتوا الأثنين غلطانيين ... فالأول ليه لم يكن عندك الحاسة الثامنة بأن تحس بالي وراك ...

وعيده بردوا غلطان إنه ما عندوش الحاسة السابعة وستين إنه يعرف سواق الميكروباص أنه عاوزه يجري ولا لا ...

قمة التخلف طبعاً ....

هي المشكلة في ثقافة كلمة انا غلطان ... وانا اسف ...

تعرف لو الكلمتين دول بقوا في القاموس بتاعنا ... نص مشاكل بتواعتنا هتنتهي ... بس نقول إيه بقا ...

تدوينة جميلة يا باشا ...

محمد رفعت يقول...

ما شاء الله

أول تلاتة نورا في التدوينة دي
ناس مشفتهمش هنا قبل كدة
ما شاء الله
........

فدوى..جزاكم الله خيرا على المرور والتعليق
...
أبو حنين

أهلا أهلا اهلا بالإرهابي الكبير
أول ماشفت اسمك هنا اترعبت
قلت أكيد هيدخل فيا شمال زي ما انا عملت معاك في المدونة بتاعتك
مع إنى عمري ما شفتك أصلا
بس انت طلعت احسن مني
وعلى رأس حبيبنا مجدي
يلا مش مهم
.....

شرقااااااااااااااااااوى

مش ممكن
عامل أيه يا حبي الكبير
نورت المدونة المتواضعة
وعلى فكرة تدوينتك الأخيرة بتاعة نقل الأعضاء دي جامدة جدا
ما شاء الله

أحمد بن شلبي تكعيب يقول...

بص يا حلو ....لما تكلم اكلم بشقلبة عشان تعرف عبر عن مجتمعك .... يعني افرض مثلا مثلا يعني ان سواق الميكروباص صح ... او بتاع العجلة ده صح ....انا بقول افرض... يعني هو بص الموضوع ده نسبي .... لكن على العموم - وانا هنا بكلم جد - الموضع ثقافة مجتمع وترسخ وجداني وفكري في عقول البشر ..... ومسألة (الاتكالية وتعليق الفشل عل الاخرين ) يجب ان نعده من "الروافد" لا من "الانهار" ...وبس كده .... سلام يا ابو رفعت

محمد رفعت يقول...

دلوقتي هرجع لأيام هندسة وأحل بالبرهان:

بما إن :أحمد شلبي علق على التدوينة

إذن: فهو راضي عنها

إذن: فهو لا يحمل تحفظ عليها

إذن: فمفيهاش أخطاء شرعية ولا أخطاء في العقيدة

وبما إن :مفيهاش أخطاء شرعية

إذن: فهتظل مثبتة هاهنا ولن يتم حذفها من المدونة

وبما: إنها هتظل مثبتة هاهنا
إذن: هتكون التدوينة الجاية هي التدوينة الثامنة إن شاء الله مش السابعة مكرر

وهو المطلوب إثباته
........

شكرا للتكرم علينا بالتعليق يا عم أحمد

غير معرف يقول...

المدونة حلوة اوى على فكرة و الموقف بتاع المسرحية فكرنى بزبزى اللى بترقص علشان تحول من كارت لخط هنعمل ايه الحياة بقت صعبة و بعدين حكاية اننا نبص ادامنا و احنا ماشيين بقت موضه قديمة المفروض نبص ورانا و نتطور بقه وبعدين دلؤت سهلوا علينا و عملوا اختراع يقول انتبه السيارة ترجع الى الخلف يعنى هنبقه متامنين المهم اللى ورانا ياسمين سعد

غير معرف يقول...

السلام عليكم
بجد الموضوع جااااااااااامد طحن
بس المفروض نحاول نبص ورانا باي طريقه ماهو العلم اتقدم ممكن نركب مرايات
وفعلا كتير مننا بيحاول يطلع على حق
شعور المظلوم اجمل بكتير ماتحس انك مذنب
حتى لو حاجه صغيره
بس حلوة فعلا وان شاء الله تبقى ااتدوينه100 عن قريب
نيرة

محمد رفعت يقول...

أهلا بالأختين والصاحبتين والرفيقتين دوما
نيرة , وياسمين
نورتوا المدونة
وجزاكما الله خيرا على التعليق وعلى إعجابكوا بالتدوينة

غير معرف يقول...

السلام عليكم

دى اول مرة اكتب عن مدونتك يا محمد بس مش اول مرة اقرالك مدونة بجد جمال جداا

كل مدوناتك اما بقى عن موضوع المدونة دى فهو جميل جدا ومهم جدا جدا لان الحقيقة ان الانسان فعلا كدة بيحب دايما يعلق الاخطاء على شماعة الاخرين ميحبش يشوف هو اية اللى عمله غلط ويصلحه يقول ما هو فلان وفلان يقول على فلان تانى خالص ونفضل كدة وهو دة السبب فى اللى احنا فيه مش هنتعدل ابدا غير لما نعترف بغلطاتنا

هدى زكريــــــــــا

أكرم يعقوب يقول...

اكيد ماينفعش ان احنا نعلق اخطأنا على غيرنا بس فعلاً صعب أوى حوار انك تقع لقدام بس لو حاولنا اكيد هنقدر زى مزدنى للتنمية البشرية بتقول "نقدر..؟طبعاً نقدر
مدونة جامدة يا أبو رفعت

شيخ العرب يقول...

يا راجل يا مهم
انت برضو بتعاملني بنفس الطريقة
يعني آجي أطلبك ع الموبايل
ألاقيه مرفوع من الخدمة
و كأنك بتقول لي : يا راجل مش لازمتكلم موبينيل عشان ما يشيلوش الخط
انت جننتني
زي قدرتك المبهرة في التقاط المواقف و التعليق عليها
علي زلط

أبو نضال يقول...

موضوع مهمممممممممممم جداااااااااا

ليه تلقائيا أول ما تقول لواحد انت غلطان يقولك لأ؟؟

سبحان الله كل الناس بتبقى مش غلطانة، و لو طبقنا نظرية المؤامرة، يبقى أكيد انتوا عارفين مين السبب :))

المشكلة اننا ساعات غصب عننا بنبقى كدا، و الموضوع دا محتاج تدريب كتير

ربنا يهدينا للرشد و الصواب...اللهم آمين

غير معرف يقول...

كلامك حلو يا ابن رفعت .. ومتناول الموضوع بطريقة جميلة
.. أنا أول ماقرأت عنوان التدوينة
افتكرت كلمات أحمد مطر اللي بيقول فيها :

يشتمني ويدعي أن سكوتي معلن عن ضعفه ،
يلطمني ويدعي أن فمي قام بلطم كفه ،
يطعنني ويدعي أن دمي لوث حد سيفه ،
فأخرج القانون من متحفه ،
وأمسح الغبار عن جـبـيـنـه ،
أطلب بعض عطفه ،
لكنه يهرب نحو قاتلي وينحني في صفه ،
يقول حبري ودمي : " لا تندهش ،
".من يملك القانون في أوطاننا ، هو الذي يملك حق عزفه

مصعب الجمّال

محمد رفعت يقول...

مرحب تاني بالناس اللي شرفت من جديد
.......
هدى زكريا
أهلا وسهلا ونورتي المدونة لأول مرة بتعليقك
وجزاكي الله خيرا على المرور
......
حبيب قلبي ورفيق دربي وشريك المصير إن شاء الله
أكرم العوضي
بكرة تعمل الأجمد منها ...والأيام بينا
بس قول إن شاء الله

..........

يا نهااااااااااااار أبيض
أنا مش مصدق نفسي
أنا ذهلت لما شفتك هنا يا
شيخ العرب
يا مفاجآتك
والله اتفاجئت جدا
ما كنتش اعرف إنى مهم أوي كدة لدرجة إنك بنفسك تشرفني هنا
يعني القلم اللي بيشرف المصري اليوم
شرف مدونتى النهاردة
يا دي الهنا

.......

أبو نضال؟؟
يا عم سيبك انت من التعليق والكلام الفارغ ده
انا عاريزك انت بس تدعيلي أخطب
وملكش دعوة انت بالمدونات والشغل ده
إنت يا با دورك اكبر من كدة
إنت تقضيها دعاء وخلاص
........

مصعب الجمال
أعتذر إني مش هرد عليك
لأني مش برد على أي حد من ريحة هندسة

يعع
ريحتك شحم وزيت كدة يا ميكانيكي يا بتاع الورش

متجيش هنا تانى
وقول للناس اللى عندكوا محدش يهوب ناحية هنا خالص
بالذات الناس بتوع الطوب والزلط دول بتوع مدني

غير معرف يقول...

هم كدا الصعاليك على مر العصور والأزمان
بيعضوا الإيد اللي اتمدتلهم

ياجماعة ( ابن رفعت ) نقطة سوداء
في تاريخ هندسة عين شمس

مصعب الجمال

غير معرف يقول...

السلام عليكم ورحمه الله وبركاته

انا عارفه طبعا انى بكتب متاخر قوى

بس بجد مكنتش عارفه ادخل علشان الامتحانات

المهم

الموضوع طبعا جامد جدا زى كل مره بجد والله

وفعلا موقف ينرفز قوى بتاع السواق الى قالك بص وراك

(يبقى انته اكيد فى مصر)

دى طبعا الكلمه المعتاده الى نفسنا نغير مفهومها

محمد رفعت يقول...

مصعب يا ابين الشهيد
يلا هش من هنا
يا بني هندسة عين شمس هي اللى مقدرتش قيمة العباقرة
وهي اللي نقطة سودة في حياتي
والحاجة الويدة اللى استفدتها منها
إنى اكتشفت إن ليا في السيما والمسرح
ويلا مش مهم
......

مروة
أهلا مرة تانية وجزيتي خيرا على مرورك الدائم هنا.

غير معرف يقول...

بتفكرنى بواحدة كانت ماشية فى الشارع وباصة على هدومها وعمالة تعدل فيها ومش شايفة ادامها وقامت جاية خابطة فيا قامت قايلة "ايه ده انت طلعت لى منين" حاجة تفقع يا اخى

محمد رفعت يقول...

نقول مبروك على ظهور مدونة الرشيدي الميزان؟؟

ولا دي كانت تجربة للاسم؟؟

Reem يقول...

التدوينة قريتها متأخر ب ليا كلام عليها
التدوينة جميلة انت اتكلمت عن "تعليق أخطائنا على الغير" كلام كويس بنبرر غلطنا على ناس تانيين ممكن صح يكونو سبب وممكن وده الاكيد ان ده مجرد هروب من مواجهة فشل او خطأ ما
وزى ماقولت ثقافة مترسخة في عقولنا
بس تفتكر ايه الحلول؟
جارى البحث عن حل
بعيدا عن التدوينة اوقات الخط بيكون عادى عندك واوقات يكون العكس مش عارفة ليه؟

محمد رفعت يقول...

ريم
أهلا بيكي كالعادة في كل تدوينة
أولا هبدأ من الآخر للأول
بالنسبة للخط في المدونة هنا
أنا كنت بس بظبط حاجات كدة في المدونة
والحاجات دي كانت بتخلي الخط يصغر أوي
كنت حاطط خلفية صورة الجامعة ورا الكلام
وده كان بيخلي الكلام يبقى صغير مش عارف ليه
لكن أنا شلتها خلاص
وإن شاء الله الخط هيبقى مظبوط بعد كدة
وجزاكي الله خيرا جدا على التنبيه
...........

المهم
متفق جدا مع كلامك إن ممكن أوي يكون جزء من بعض المشاكل اللى احنا فيها بيكون فعلا في أطراف تانيين هما السبب فيه
كلامك صح 100في الـ100
وده طبعا مش بيناقض الكلام اللي في التدوينة
لكن
الغلط كل الغلط
هو تعليق السبب في الفشل كله كدة على الناس التانيين أو الظروف او غير كدة
يعني ممكن مثلا
أنا احل في امتحان وحش
والامتحان يكون فعلا جاي صعب جدا
لو أنا حليت وحش
وقلت غن السبب لمجرد إن الامتحان كان جاي وحش
أظن إن ده هروب
لكن
الامتحان وحش
وانا مذاكرتش المذاكرة المتقنة اللى تخليني أقفل الامتحان
.....
كذلك مثلا
لما أقول
مفيش شغل في البلد والبطالة مرطرطة والناس قاعدة عالقهاوي
وانا كدة كدة مش هلاقي شغل
يبقى لألألألألألأ
كون إن انا مش لاقي شغل ده بسببين
الأول إن فعلا في بطالة ففرص العمل مش كتير
التاني إن أنا ما اجتهدتش ولا جبت آخري ولا حاولت أتعلم مهارات تميزني عن غيري في أنى أكون متميز واقدر ألاقي شغل أسهل من غيري

كلمة سمعتها من بنت معانا في الدفعة لما بتقولى
انا عايزة أدخل قسم إذاعة وتلفزيون
كان نفسي أشتغل مذيعة في التلفزيون بس مش هينفع علشان الحجاب
فأملي بقى في الإذاعة

أيه ده؟؟؟؟؟

قلتلها: إزاي يعني؟

الدنيا اختلفت كتير والقنوات الفضائية فتحت فرص ماكانتش موجودة والكلام ده كان يتقال زماااااان مش دلوقتي
........

الخلاصة
إن طبيعي هيكون في أسباب كتير تعوق النجاح
لكن ما يعنيني انا
هو السبب الخاص بيا أنا
هو اللى انا أقدر أغيره
ولما أغير أنا السبب اللى بإيدي
وأعلن بقوة إن فيه أسباب تانية لازم تتغير برضه
ساعتها
الدنيا هتفرق كتير
......

حاجة أخيرة بقى

مش معنى إني أنشغل بالحاجة اللى انا سبب فيها إنى أخرس واسكت وابطل اتكلم عن الحاجات التانية
لكن أسعى بكل جهدي إنى أغير المشكلة اللي بسببي
وفي نفس الوقت
أقول
يا ناااااس
خلو بالكوا
مش أنا بس المشكلة
ده في كذا وكذا ولازم كلنا نغيره


يعني مينفعش اقول

أنا مش لاقي شغل علشان انا وحش واسكت
لأ
أغير نفسي وأجهز واتعلم
وبرضه أقول
البلد فيها بطالة وفساد والوضع ده خطير ولازم الناس تقوم وتتحرك والبلد بتتنهب وفي رشوة ووسايط وحسوبية
لكن
كل ده ميمنعنيش غنى آخد بكل أسباب تفوقي في نفسي

.........

مهما إنت كنت كويس وبتحاول تصلح نفسك وتبص لعيوب نفسك

لازم ما تسكتش على ظلم او فساد وتقول خليني في نفسي
اشتغل بإيدك
وانكر المنكر بأعلى صوتك

حتى لا يفهم من كلامي أنى ادعو للسلبية والسكوت على الظلم
.....

يا ترى الكلام واضح

ولا أنا قعدت أرغي كتير لحد ما زهقتكوا؟؟؟