السبت، 21 يوليو، 2007

بكرهك يا إنجي




بكرهك جدا
بكرهك في الله

كرهي ليكي ضخم
قد تكون هذه بعض الكلمات التي تعبر عن إحساسي تجاهها


تلك المسماة بـ ( فاكالتي أوف إنجي نييرينج) أو كلية الهندسة أينما كانت سواء في عين شمس أو القاهرة أو المنصورة أو أسيوط أو حتى مودرن أكاديمي أو هندسة العاشر

وبما إني بقول بكرهك في الله
فإن كرهي لها قائما على أسباب منطقية وأسس واقعية وإلا كان كرها غير مبررا أو ناتجا عن عقد وكلاكيع نفسية

................


باشموهندز قد الدنيا


تمعنت وتأملت كثيرا في سبب تلك النظرة الحمقاء الذي ينظر بها مجتمعنا المصري أو الشرقي بشكل عام إلى كلية الهندسة على أنها الأمل المرجو الذي ينمو عليه الصغير ويشب عليه الفتى ويندم على فواته الكبير


يا ترى ليه؟؟

ولما فكرت وجدت مجتهدا بعض النقاط أو الأسباب علها تفسر تلك النظرة العجيبة
:وإليكم بعض تلك الأسباب

لقب الباشموهندز فلان الفلاني*

بالرغم من أن هذا اللقب أصبح ينادى به كل فئات المجتمع من أول المهندس الحقيقي وحتى تباع الميكروباص أو الزبون اللي هيدفع الأجرة
إلا ان هذه اللقب لا يزال يمثل عند البعض فخرا...فيا عجبا
لا أتصور أن هناك أفرادا لا يزالوا بالسذاجة التي تجعلهم يطمحون في أن يكتب اسمهم مسبوقا بحرم (م) أو (د) وكأن هذا شرفا
غير أن كونى طالبا سابقا في كلية الهندية لمدة عامين متتاليين جعلني أصدم بهذه الشريحة من البشر...فعجبا لهم

الإرث التاريخي عن تميز المجال الهندسي*

فقد كان المجال الهندسي لحقبة عتيقة من الزمان هو المجال الأوفر حظا بالنسبة لفرص العمل, إلا أن هذا الوضع قد تغير كثيرا لعدة عوامل
منها تشبع كليات الهندسة بما يزيد عن طاقاتها من الطلاب , ومنها أيضا تراجع التوسع في المد العمراني الذي صاحب فترة الثمانينيات والتسعينيات في مصر وهو الأمر الذي تراجع إلى حد واضح في الفترة الحالية مما أثر بشكل مباشر على توافر فرص الطلبة الملتحقين بأقسام الهندسة المدنية والمعمارية وما يتبعها من هندسة الكهرباء أيضا
وبالتالي
فقد أصبح قطاع كبير من جمهور المقاهي في مصر هم هؤلاء البشموهندزين المحترمين

يمكنك التأكد من ذلك من خلال زيارة خاطفة لبعض القهاوي الشهيرة مثل قهوة المشربية في مدينة نصر أو الثلاثية
بعين شمس أو الفيشاوي في الحسين أو غيرهم

ترسخ ما يسمى بثقافة كليات القمة*

وهذه الثقافة المقيتة التي رسخت في المجتمع مصطلح (القمّة) دون أن تترك لنا توضيحا عن ما هية تلك القمة أو حتى القمة دي تبع أيه؟؟
وعلى أي أساس تم تقسيم الكليات إلى قمة وقاع؟؟
هل على أساس المجموع الذي يحرزه طالب الثانوية بعد أن يأخذ الكثير من المنشطات المسماة بالدروس الخصوصية التي تمكنه من الأداء بشكل أفضل والحصول على مجاميع أعلى
أظنه معيارا قبيحا وفاسدا للقياس
قد تكون كلية الهندسة بالفعل هي كلية القمة...إذا اعتبرنا أن المقصود هو قمة القضاء على مهارات الطلبة
أو قمة صرفهم عن اهتماماتهم الحقيقية..أو قمة القضاء على وقت الشاب ومنعه من ممارسة هواياته ومهامة الحياتية الغير دراسية
أو قمة الوبال الذي يصيب الطالب بمجرد دخوله إياها...إلا من رحم ربي

أو لأنها مفيش غيرها*

وهذا بالطبع يرتبط بطلبة شعبة (علمي رياضة) الذين اختاروا هذه الشعبة لأحد الاختيارات الثلاث الآتية

أ- إنه فعلا مبدع وبيحب مجال الهندسة وبارع في الرياضيات ويعشق علوم الفيزياء وقادر على التبحر والإبداع في هذه العلوم وعلى الإضافة في هذا المجال وليس مجرد الإطلاع والإعجاب
(وهذه الشريحة نادرة جدا جدا)

ب- أنه لا يميل للكليات الطبية بمختلف أنواعها ولا يحب المجال الطبي فلم يجد إلا الهرب من قسم (علمي علوم)

ج- أنه لم يرد أن ينظر المجتمع إليه أنه من هذه الشريحة المتدنية الوضيعة - من وجهة نظر المجتمع- المسماة بطلبة (أدبي)
والذين ينظر إليهم أنهم طلبة الحفظ لا الفهم وطلبة الاستظهار لا الإبداع
ومهما يكن السبب الذي دفع بالضحية لدخول مجال الهندزة وخوض غمارها...فإن النتيجة تظل واحدة موحدة
وهي

تشبع الأمة الموكوسة بأعداد رهيبة من المهندسين حتى وإن لم يكونوا مبدعين في هذا المجال أو مميزين فيه
وبالتالي ترهل أعداد المقبلين على العمل في المجال الهندسي بفروعه المختلفة

فضلا عن

نسبة الرسوب الرهيبة بين طلبة كليات الهندسة بالرغم من أنه من المفروض أن هؤلاء هم الطلبة الذين تفوقوا وحازوا على درجات تفوق الـ94 في المائة...فيا عجبا


.........


رفقا بأنفسكم

وهو نداء أخير شفيق إلى طلبة الثانوية العامة المقبلين حاليا على تحديد مستقبلكم

"أنتم وحدكم الذين تختاروا طريقكم...فلا تتركوا المجتمع يختار لكم ولا حتى آباءكم أو أمهاتكم...فطريقكم أنتم وحدكم الذين سوف تتحملون مشقة السير فيه ولن تجدوا بجواركم أحدا ممن أملى عليكم اختياراته أو نظرياته أو قيمه الخاطئة..وحينها يكون الخطأ خطأكم وحدكم لأنكم الذين اخترتم


فإن كنتم لا تزالون في طور التردد
فافعلوا كما فعل بعض من قبلكم
خوضوا التجربة بأنفسكم...ولكن
كونوا شجعانا ..وإذا وجدتم أنكم بعيدون عن أحامكم وطموحاتكم....فلا تترددوا في تحويل مساركم أو بمعنى أصح تعديله مهما فاتكم من الوقت

وذلك قبل أن يأتي يوما تندمون فيه ولا تستطيعون أن تصلحوا ما أفسده عليكم المجتمع


وبكرهك يا إنجي نييرينج

هناك 29 تعليقًا:

الباشمهندزة يقول...

مش عان انت معقد تعقد كل الناس تجربتك مش لازم تتكرر مع كل الناس

Akram يقول...

ياااااااااااااااه كل دا حقد و ضغينة جواك يا رفعت لهندسة من الواضح إنها عقدة كبييييييييييرة أوى أوى أوى أوى بس بردو لازم نبص لهندسة من
الناحية المشرقة

أكرم العوضى

غير معرف يقول...

انا كنت عارفة انك يتكره انجى..بس عمرى ما تخيلت ان الكراهية ممكن توصل للدرجة ديه....هى ما عملتلكش حاجة انت اللى وافقت بيها من الاول..بس الحمد لله انك راجعت نفسك و سيبتها و روحت للى بتحبها..ومتفقة مع احلامك و ميولك..
....................
بس فيه حاجة..انا حسيت فى الجزء بتاع ترسخ ما يسمى بثقافة كليات القمة..انك بتظلم الهندسة جدددا لمجرد انها مش متفقة مع ميولك الحقيقية
.....................
حاجة كمان...اللى يقول على شريحة أدبى شريحة متدنية او ما شابه ذلك...نقطع لسانه.......دول احسن ناس (:
.....................
وعلى فكرة...هندسة ديه محترمة جدا..بس كل ما فى الامر انها مش متفقة مع ميولك اطلاقا..عشان كدة كان من الطبيعى انك تكرهها..بس كدة
ديه كفاية انها عرفتك على حبيب قلبك مصعب...شوفت بقة؟؟ (:

سلام عليكم

خلود

أسامة الرشيدى يقول...

يارفعت يا ابنى الشعب المصرى كله عايز ولاده يبقوا حاجة من التلاتة

مهندس أو دكتور أو ظابط

هما دول المهن المعترف بيها رسميا فى مصر

أنا أعرف ناس كتير مابيفهموش حاجة ودخلو علمى وكانوا بيتريقوا عليا عشان دخلت أدبى

هما جابو مجاميع قليلة واضطروا يحولوا أدبى فى تالتة ثانوى
طب ماكان من الاول

لاء أصله لازم يحاول فى الأول يطلع باشمهندز حتى لو كان طور الله فى برسيمه

أخويا خريج هندسة كنت بشوفه ماشى بيكلم نفسه
وكان بيقولى أول أسبوعين فى الكلية الدفعة اتصدمت وبقم يكلموا نفسهم من الصدمة كأن فى كائنات فضائية بتشرح لهم المنهج

أنا أكره هندسة أنا كمان
أكرهها فى الله زيك
وأحبك فى الله

محمد رفعت يقول...

السلام عليكم ورحمة الله وبركاته

ياااااه

من زمان اوي مردتش على تعليقات
بس الحمدلله الكمبيوتر اتصلح
ونرجع نرد من جديد
....

الباشمهندزة

أها أهلا بيكي
تقريبا أول زيارةليكي عالمدونة
ونتمنى متكونش الأخيرة إن شاء الله

ويا رب كل طالب كدة ربنا يرزقه بواحد معقد وكلاكيعوا ينبهه قبل ما يقع
أو على الأقل
يخليه يفكر شوية قبل ما ياخد القرار

بدل ما بقى طالب الثانوية مبيفكرش أصلا في واحد من أهم قرارات حياته واللي هينبتني عليه مستقبله بعد كدة

بل سكتفي بإن المجتمع يقوله ده حلو وده وحش
ودي قمة ودي قاع

ويلا مش مهم

ونورتي التدوينة والمدونة بمرورك الكريم
.......

أكرم

حبيبي اللس أنا مطنشه وبايعه بيعة وحشة أوي
ومش عايز يعزمني عالغداء

والله يا أكرم بالنسبة لموضوع الجانب المشرق ده...مش عارف

بس متحاولش
:)

......

محمد رفعت يقول...

أنا أسف يا خلود واسامة

قبل ا أرد عليكوا الماكينة داست
enter
لوحدها فالتعليقات نزلت قبل ما اكملها
بس مش مهم
أرد في بتاعة جديدة
........

خلود

أهلا بيكي في التدوينة والمدونة برضه
وشرفتي المكان بمرورك

بالنسبة لموضوع إنجي
فالكلمات تعجز أن تعبر عن مشاعري ناحيتها
الموضوع أعمق من كدة بكتير

أما ثقافة كليات القمة

فدي فعلا حاجة أنا مقتنع بيها جدا مش مع إنجي بس والله
لكن كمان
مع طب وصيدلة
لأن التصنيف دع فاشل جدا
وكل طالب ليه كلية قمة مختلفة
والحاجة المتفقة مع ميول الشخص تبقى هي دي كلية القمة بتاعته
مش كل واحد يرشق في كلية متفقة مع ميول ابن خاله
وبكدة سميناها قمة

أما عن شريحة ادبي
فبكلامك ده يبقى بتدعي على 3/4 المجتمع

وأما عن مصعب
فمع كرهي الشديد وسخطي على إنجي
إلا أنى لا انكر أني قابلت فيها خيير من التقيت في حياتي
وعمر إنجي ما هتفرق بينا حتى بعد ما أنا سبتها
......

أس أس الرشيدي

حبيب قلبي الغالي الكبير الإماراتي الخليجي بتاع النفط

عامل أيه يا ابني

فكرتني يا ولا
أيام ما كانا بنحفظ الكيدز قرآن
فكل ما نسأل كيد من الكيدز عايز تطلع أيه
تنحصر الردود في 3 اختيارت مفيش غيرها
(ظابط - مهندس - دكتور)
أما بقى لو الواد ده فاشل أوي
يقولك
طيار

حاجة تفقع يا جدع
ويلا مش مهم

khaled zaki يقول...

اسم المدونة رائع جدا وبالنسبة لمحتواها فانتا اكيد بتخوف طلاب الثانوية يا عم ده عملة زى الدوامة الواحد عايز اى مجموع الأول وعلى فكرة انا علمى رياضة وبأذن الله ناوى حاسبات ومعلومات

SHAHEENSHY...فوضى منظمة يقول...

حبيبي اللي لسه مشفتوش .. قد كده بتكره انجي ..بس على فكروة انا عايزك تنظر نظره موضوعيه لكليه هندسة .. مش في مصر ولكن في العموم .. لو ان فعلا المهندسين الخرجيين كانو مبدعين وعلى كفاءة عاليه ..تفتكر كان حال البلد هيختلف كتير دلوقتي .. كل حاجه ي الدنيا فيها هندسه .. حتى الاعلام .. أي حاجه ..؟؟ سلام بقى يا صاحبي

Ahmed ElBadry يقول...

salamo 3lako
sara7a ya rf3t .. fy klamk enta 3brt 3n moshkla nos enas w23ha fyha
wana wa7d menhom !!!!
u know .. edoctor ra7 edoctor gh :S

هشام رمضان يقول...

انا قرأت الموضوع و كمان قرأت الردود بعض الردود و كونت الرأي التالي : انت معقد او متغاظ لأنك مفلحتش فيها (( انا معرفش - انا بخمن ))
او ... او .. مش عارف اقول ايه
!!!!!!!!!!!!!!!!!!!!!

محمد رفعت يقول...

خالد زكي باشا

إزيك يا واد؟؟
عامل أيه؟
منور يا بركة
إديها حاسبات يا عم
أي حاجة تكون متوافقة مع ميولك
........

شاهنشي
الراجل البياع اوي
الكبير أوي
عامل أيه يا ولد
كلامك صح
وأؤيده بعنف
بس المهم الناس تفهم
.........

أحمد البدري

الرجل الذي لا بأس به
وأحد ضحايا خطيئة المجتمع في تصنيف الكليات
إلى قليات قمة وكليات رمة

ربنا يفك أسرك يا بني إنت وأمثالك

ويبصر الشباب بمصلحتهم مش باللى أهاليهم يختارولهم
........

هشام
حبيبي وأخويا الصغير
الله يسامحك يا عم
خلاص عندي فكرة
خش هندسة وجرب

مروه يقول...

السلام عليكم ورحمه الله



واضح كرهك الجامد اوى لهندسه




بس الحمد الله انك قدرت تاخد قرار وتحول




وتبقى فى الكليه الى انته لاقى نفسك فيها


وعلى فكره انا حروح اقدم للكورس يوم الخميس


لانه حيبدا فى 8

أحمد أبو خليل يقول...

مجرد صنمين
صنمين من أصنام المجتمع يسميان طب وهندسة ، كل ما هو مطلوب منا ، أن نحطم هذين الصنمين ، في ثورة أو في هدوء

لكن غير مطلوب منا أن نقيم على أنقاضهما صنمين آخرين
يرفعان شعار معاداة الطب والهندسة
لا يجب أن نلدغ من نفس الجحر الذي نحاول أن نغلقه


حد فاهم حاجة

غير معرف يقول...

طب انا لسه مخلص ثانوية و علمى رياضة وجايب 99% قولى nom انا ادخل ايه غير هندسة ورد على me qiukly
... e.mezo@hotmail.com ...

mezo يقول...

طب انا لسه مخلص ثانوية و علمى رياضة وجايب 99% قولى nom انا ادخل ايه غير هندسة ورد على me qiukly
... e.mezo@hotmail.com ...

AbdElRaHmaN Ayyash يقول...

بجد انت اول واحد اشوفه بيكرهها يا مستر محمد
انا بموت فيها و الله
دي كلية روعه
و الحمد لله اللي قدرني و دخلتها
ويارب اكون ادها بس
بجد كلية تحفه
بس انت لو سبت انجي .. فأنا همسك فيها بايديا و سناني:D
سلام يا مسيو

محمد رفعت يقول...

مروة

أهلا أهلا قي التدوينة الجديدة

وكرهي لهندسة حاجة واضحة في كلكلمة بقولها من قبل حتى التدوينة دي
ويلا الحمدلله

مقلتيش كورس أيه اللي هيبدأ؟؟

........

أبا خليل أوس القحطاني
أصنام
وماله يا أخي
تشبيه جامد فعلا
هندسة خزاعة
أو طب مناة

المهم
كلامك صح جدا يا أبا جهل والله
وانا فعلا فكرت فيه كتير جدا

وعمري ما هسعى لإني أجعل من إعلام وسياسة بديلا عن طب وهندسة
بالرغم من إن الأمة محتاجاهم أوي
إلا إن
كل واحد
هو اللي يحدد
هو يقدر يدي في أيه
ويلا مش مهم

......

أما انت يا ميزو

فكلامك معايا على الرسول الإلكتروني

....

عبدالرحمن عياش

يا راجل

أكيد أنا مش اول واحد
بس بص حواليك في الدفعة والسكشن وهتلاقي كتير أوي مش بيطيقوا إنجي

لكن
جميل إن يكون شعورك ناحيتها كدة
وده المطلوب
وده معناه إنك دخلت المكان الصح

وابقى سلملي على إنجي
وهايدي بالمرة كمان

عيلة و عايزة افهم يقول...

السلام عليكم و رحمة الله و بركاته

بصراحة ماقدرش الومك على كلمة واحدة لأني تقريبا في نفس الوضع

بس في اختها من الرضاعة ... طب

و فكرت كتير جدا تفكير جدي اني أحول ...بس ماعنديش القوة إني اخد القرار .. خصوصا بعد سنتين ... لسة مابقتش بالقوة دي


الموضوع مش موضوع هندسة في حد ذاتها

الموضوع إنك تفضل طول عمرك تدرس و تشتغل في حاجة مش بتناسب قدراتك

القدرة دي نعم أنعم الله علينا بيها

و المفروض استخدمها صح

مش ابقى في مكان قدراتي فيه معطلة و في نفس الوقت بعافر عشان اقدر اثبت نفسي في المجال ده و انا معنديش مهاراته اصلا فبالتالي حيبقى الوضع صعب قوي

و الدليل إن حضرتك ما شاء الله لما حولت بقيت من الأوائل

لو فكرنا في الموضوع من الناحية دي مش حنفكر كتير في قناعات المجتمع

و عشان أخويا الصغير هشام فنا باقولك إني الحمد لله متفوقة في طب ... يعني الكلام ده مش عشان فشل و لا حاجة

بس في نفس الوقت عندي شعور بالذنب ... لأني مش باستغل النعم اللي ربنا انعمها علية

احلى حاجة بقى اني اخيرا شفت الفئة النادرة اللي بتحب كلية القمة اللي داخلاها
ربنا يكرمك يا باشمهندس عبد الرحمن
كنت فاكرة الفئة دي انقرضت ... بس طلعت لسة موجودة

الحمد لله انك اخترت اللي بيناسب ميولك

غير معرف يقول...

eshta ya ref3at ana se2t elsanadi we kalamk kolo sa7 fi sa7
3bd elrahman

محمد رفعت يقول...

عيلة وعايزة تفهم

أهلا بيكي لأول مرة في المطبات
وكلامك ممتاز جدا
مش لأنه موافق كلامي
لأنه كلام عقلاني مش نابع عن رغبة في الدفاع وخلاص

مش عارف ليه ساعات لما بنحس إن حد بيقول الحاجة اللي جوانا نهب في وشه ونقوله
لا لا لا لا
إنت غلطان

هو انا يعني بقبض فلوس على كل واحد بطفشه من هندسة ولا طب؟؟

الموضوع كبير
وده مستقبل أمة

وكل واحد لو أهدر مواهبه في مكان مش بيحبه
يبقى باي باي يا مستقبل

وبصوا حواليكوا وشوفوا أصحابكوا
كام واحد أهدر رغباته في حاجة مش بيحبها

تانى حاجة بقى

أنا دخلت مدونتك الرائعة
ولقيت رسالة من مصعب الجمال انتى حاطاها في آخر تدوينة
انبسطت جدا

بس مفهمتش درجة القرابة
لكن مادام انتى من طرف مصعب

ألف أهلا بيك ونورتي المدونة
وربنا يرجعه بالسلامة لينا

.........

عبدالرحمن

إنت مين ياض؟؟
عالعموم
أهلا بيك في نادي الراسبين هندسيا
ولا يهمك يا عم
بس المهم
القرار دلوقتي قرارك انت
مش قرار حد تاني

بحبك يا انجي يقول...

مش حاعيد كلام متكرر بس انت معقد نفسيا وده واضح جدا لانك لو بتكره الهندزة من اسباب حقيقة كنت كرهت معاها كليات تانية كتيير
لو عايز فعلا تغير بلدك يبقى المفروض تكره الناس اللي تفيكرها ان دي كليات قمة مش تكره الكلية نفسها وتحاول تغير فكرهم مش بالتقليل من الكليات التانية لاء وانما بانك تبين انها مش لوحدها على الساحة
انا في انجي وبموت فيها بس بكره نظرة القمة والقاع كل الكليات قمة بس....لو فيها اللي بيحبهوا بجد

محمد رفعت يقول...

موافق جدا على كلامك يا بحبك يا إنجي

وأحترم جدا كل كمة كتبتها او كتبتيها

ومادام بتحب او بتحبي إنجي
يبقى يا إن شاء الله ربنا هينفع بيك / بيكي في المكان ده
أهم حاجة إنك لاقي/ لاقية نفسك فيه

أما موضوع إنى معقد ومكلكع وكلاكيعو من إنجي

فانا مش هنفيه
ممكن يكون فعلا موجود

ويلا مش مهم

عيلة و عايزة افهم يقول...

جزاك الله خيراً

أن مش قريبة الباشمهندس و لا حاجة .. مجرد نت يعني

بالنسبة بس للباشمهندس بحبك يا انجي الموضوع مش عقد و كلاكيع و لا حاجة
بس كل واحد بيبص للموضوع من نظرته الخاصة
يعني انا دلوقتي ماكنتش عايزة ادخل طب و دخلتها فيمكن شايفاها مشكلة في حياتي و مش بحبها
حاكره هندسة ليه ؟
ما يمكن انا كانت ميولي هندسية من الاول ( و ده شوفته في ناس على فكرة كانت ميولهم هندسة و دخلوا طب عشان الاهل )

صحيح اكره نظرة المجتمع اللي كانت السبب اني في مكان مش بحبه
بس افتكر معظم غضبي حيبقى منصب على الموقف اللي انا فيه اللي بيتمثل قدامي في الكلية دي

إنما لو واحد موهوب فيه و بيحبها .. الوضع يختلف

محمد رفعت يقول...

صحيح نسيت أسألك يا أختنا اللي عايزة تفهم

مادام لوقتي إنتي في كلية مش بتحبيها
وشايفة إن ميولك مش متفقة معاها

وإن في مكان تاني ممكن تبدعي فيه أكتر

أيه اللي مقعدك في طب؟؟

أنا الصراحة شايف وعن تجربة إنك لو حولتي هيكون أحسن كتييير

ومتبصيش لموضوع مش عارف كام سنة ضاعت والكلام ده
مفيش حاجة اسمها سنين بتضيع

لو كنا بنعتبر إن الحاجة الوحيدة اللي بنستفيدها في حياتنا هي المناهج
وإن مقدار إنجازنا في حياتنا بيتم حسابه بكمية المناهج اللي درسناها

ساعتها بس أقدر أقولك إن في سنة أو اتنين ضاعوا
لكن الموضوع مش بيتحسب كدة

انتى أكتسبتي حاجات كتير وخبرات كتير من كل مكان خلال السنة أو الاتنين دول
والحاجات دي هتفضلي تستفيدي بيه طول عمرك
يعني مفيش حاجة بتضيع

لكن لو استمريتي في مكان مش بتحبيه
مهما تفوقتي فيه
بعد فترة هتحسي إنك بالفعل ضيعتي وقت كبير في حاجة مش بتحبيها
وكان ممكن تبدعي في أماكن تانية أحسن

وده رأيي الشخصي
اللى لامسته بنفسي بعد تجربة سنتين في هندزة
وسنة في مكان بحبه جدااللي هو إعلام

وبنا يوفقنا كلنا
ويهدي كل واحد لما فيه الخير له

وقريبا هتابع إن شاء الله الموضوع ده في تدوينة تانية
بس يع ما اشارك في الحملة

وجزيتم خيرا

علي عمرو يقول...

موافقك تماما وانا كمان ورك في السكة انا في هندسة وقضيت فيها تالت سنين بس فعلا الواحد خلاص مابقاش قادر يستحمل كل العك واللخبطة دي خصوصا اني دخلتها على غير الرغبة
وانا كمان بكره انجي

عيلة و عايزة افهم يقول...

انا مع حضرتك جدا يا أستاذ محمد

بل على العكس

انا لو حولت اي كلية فيكي يا مصر حاخلص قبل كليتي اللي انا فيها دي اساسا
:D

كل الكلام اللي حضرتك قلته ده انا عارفاه و مقتنعة بيه

بس الحقيقة يا أستاذ محمد إن أنا معنديش القوة دي إني اواجه أهلي و المجتمع .. انا عارفة اني مش حاقدر اعملها لأني فشلت في الاختبار ده قبل كدة مرتين

انا اصلا كنت عايزة ادخل حاسبات
لكن في الاخر دخلت علمي علوم ... و كنت تعبانة جدا و بابكي لأني عايزة ابقى رياضة ... بس في الاخر كملت علوم برضة

و بعد ما النتيجة طلعت كنت عايزة اكتب إعلام أو ألسن بما إن خلاص مفيش حاسبات كان ده خياري التاني

بس في الاخر برضة دخلت طب

عندنا في البيت مفيش إجبار

بس حضرتك عارف لما تبقى كل حاجة حواليك بتدفعك في اتجاه واحد ... ناحية اختيار واحد ..

و الناس بتكلمك تقنعك و الكلام ده

اكيد حضرتك عارف و جربت

بصراحة انا باحسد حضرتك على قوتك و شجاعتك

بس انا اخدت قرار اني حاقضيها و خلاص

يعني انا مش حاسيب نفسي للكلية و اسيبها تهزمني و تموت القدرات اللي ربنا ادهالي

حاعمل اللي انا عايزاه برضة إن شاء الله

و الكلية حاقضيها و خلاص

عارفة إن الموضوع حيبقى مرهق و خصوصا نفسيا

بس ده اللي انا اقدر اعمله
لأني مش بالقوة دي

أسأل الله أن يسدد خطاك في كل طريق خير

غير معرف يقول...

بص انا معاك ان انت لازم تتخنق بحكم اللى حصلك فيها دة الطبيعى بس انا من كتر كلامك عنها حسيت انك بتكرة هندسة لهندسة اقصد بتكرة هندسة ككيان مجرد معرفش لية وبعدين بتربط الكلية بحاجات ملهاش علاقة بيها يعنى مثلا اية علاقة هندسة بالشغل الشغل الدولة مبتوفوروش مش هندسة وبعدين انا شايفة ان تعليمها لازم يكون صعب امال هنخرج مهندسين جامدين ازاى؟ بس هى دى الفكرة عمتا المهم تكون مستريح فى اعلام دلوقت واكيد ربنا كان عايز دة يحصلك عشان تروح اعلام وتلاقى نفسك فيها
دعاء

غير معرف يقول...

الموضوع ده رائع جدا وياريت اي واحد قبل مايختار الكلية اللي هايدخلهايعرف هل هذه الكلية تتفق مع ميوله وقدراته بغض النظر عن القب الى هاتديهوله او نظرة الناس سواء كانت طب اوهندسة اواعلام اوحتى خدمة اجتماعيه يعني يدخل الكلية الي هايقدر يبدع فيها ويعمل حاجة جديدة لنفسه ولامته ولبلده وعلى فكرة حال البلد دي مش هيتصلح الا لما كل واحد يدرس الحاجة الي بيحبها لان الطريق اثناء الدراسة وحتى بعد التخرج مليان صعوبات والواحد مش هيعرف يصبر ويتغلب على الصعوبات دي الا اذا كان شايف هدف بيحبه وعايز يوصله

محمد رفعت يقول...

أغرب حاجة في التدوينة دي
إن التعليقات عليها مستمرة ولا تتوقف
مع إنى عملت تدوينتين بعدها

بس كويس خير
لعلها تكون خطوة في طريق تغيير ثقافة المجتمع

.........

على عمرو
إزيك يا رفيق الرحلة
عامل أيه يا باشا

شكل إنجي عملتها معاك برضه
بس ولا يهمك
مش غلطتها لوحدها ولا غلطتك لوحدك
الغلط مشترك
والمجتمع زي ما قلت مشارك بنصيب مش قليل في هذا العك

عالعموم لو عندك استعداد تسيبها إيدي على كتفك
ولو مش هتقدر
يبقى شوف الحاجة اللي انت تحبها وحاول تمشي فيها بالتوازي مع إنجي
يا صاحب على صاحبتك
وربنا معاك

.......

اختنا اللي عايزة تفهم

خاص ده قرارك
وكدة برضه كويس
وفي ناس عملت كدة كتييير
وتفوقت جدا في الحاجة اللي بتحبها

ومن الناس دي مثلا
د\ محمد عمر
رئيس فريق زدني للتنمية البشرية
كان في طب وبعد فترة لقى إنه مش حاببها فقرر يهتم بحاجة تانية وأول ما يتخرج من طب ملوش دعوة بالمجال الطبّي ده خالص

وفعلا نجح جدا في رؤيته اللي كان راسمها لنفسه
وربنا فتح عليه وباركله
وبقى صاحب أكبر فريق تنمية بشرية في مصر
وفي طريقه للزيادة والاتساع اكتر من كدة بكتير إن شاء الله
فشدى حيلك
وربنا يوفقك

........

دعاء

أولا مرحب بمرورك الكريم في المدونة لأول مرة

وبالنسبة لهندسة
قد أكون انا على المستوى الشخصي فعلا بكره هندسة جدا جدا وده طبيعي بعد ما عشت فيها سنتين كنت بدرس فيهم حاجة بكرهها جدا ومش بطيقها

لكن
ده ميمنعش إني مقتنع جدا بإن الواحد مينفعش يدرس حاجة مش بيحبها ولا ينفع يبدع فيها
وعلشان كدة
نفسي الناس كلها تفكر في دراسة الحاجة اللي تحبها وتعرف تتميز فيها وتقدم حاجة جديدة
مش معقول ربنا خلق الناس كلها متميزين في طب وهندسة وصيدلة
ومفيش حد عنده موهبة في حاجة تانية

بس
وجزيتي خيرا كثيرا على المرور والتعليق

........

اخونا او اختنا الغير معروف\ ـة

كلامك منطقي جدا وفي الصميم ما شاء الله

وربنا يجعل تفكير الناس كلها إيجابي زي تفكيرك كدة
جزيت\ ي خيرا على التعليق
ونتشرف بتعليقك على طول إن شاء الله