الأربعاء، 26 سبتمبر، 2007

تشكر يا عمرو...طلعت مش بائظ الفكر




عام التفكير والمفاهيم

بدخولي العام الدراسي الجديد
في كليتي العظيمة بنت الحلال
أكون قد أتممت عاما أستطيع أن أسميه
عام التفكير...أو إعادة النظر في المفاهيم
أغلب الظواهر والمفاهيم وما يمكن أن أجمله في كلمة
(الحاجات)
اللي كانت حواليا
قدر الله أن أعيد فيها النظر والتأمل والتفكير
حاجات كتييييير أوي بدأت أشوفها من زاوية مختلفة
وحاجات كتير برضه...بدأت وكأني بشوفها لأول مرة
بالرغم من إني منغمس فيها منذ سنوات


المعضلة الكبرى

في وسط الحاجات اللي كنت بفكر فيها كتير
كان في مسألة
كانت بالنسبة ليا بتمثل معضلة كبيرة اوي
كان التفكير في المسألة دي
بيخليني أصاب بحالة من الحاجات الكتير اللي داخلة في بعضها
حيرة - قلق - خوف - عجب - سخط - غضب - حزن -دهشة
والأعجب
إن التفكير في هذه المسألة أيضا
كان مأثر بشكل كبييييييير جدا على نظرتي لأمور أخرى
بل
وعلى معاملاتي مع الأشخاص من حولي وطريقة نقاشي معهم
تقدر تقولـ/ـي كدة يا مان أو يا ومان
إني كنت حاسس إن في حاجة غلط
لكن مش عارف أوصل بالظبط أيه هي الحاجة دي تحديدا
وكنت عارف إن في حاجة مهمة جدا بدأت أفكر فيها...لكن
مش قادر بالظبط أحط إيدي على العلاج
لأني ببساطة
لم أكن قد وضعت يدي على أصل المشكلة
......
أيه الكلام الكبير ده يا أبو رفعت
أنا بقيت جامد أوي
وطنط منى وأونكل رفعت (اللي هما مامي وبابي) حقهم يفرحوا بابنهم طحن
ويحسوا إنهم خلفوا حاجة جامدة


لمبات على الطريق

المهم يا آل النت
إن طوال العام الماضي
كان في حاجات كدة كل فترة تظهر
أشعر معها أني أقترب من أصل المشكلة
وبالتالي من الحل أو قل بداية الحل
علامات ضوئية على الطريق بدأت تتوالى في عقلي
أو لنقل
أن (الله) عز وجل وتعالى في عليائه فوق عرشه العظيم
قد وضعها أمامي مرة فمرة
حتى يترك لي الوقت في استخدام فضيلة التفكير والبحث والاجتهاد
لله الحمد والمنة


عمرو..حط الفيشة

ومن حوالي أسبوع
كان
الشاب الطموح بيوصلني بعربية أخوه اللي هو مقلبها
عائدين من صلاة التراويح في المدبح إلى شقة بابي ومامي في مدينة نصر
وبدأت أعرض عليه طول التفكر خواطري المكلكعة
وفوكيراتي المعقدة المتداخلة اللي انا مش فاهملها رابط ولا صلة ببعضها
وظللت أخرج من موضوع لأدخل من موضوع
وكل ما أنقل من موضوع لآخر...ألاقي
عمرو طموح يقوللي
(خد بالك...إنت كدة نقلت لموضوع تاني خالص)
فأرد عليه وأقوله
(أعمل أيه ما انت اللي عمال تطلّع كل اللي جوايا)
وظل
عمرا سايبني أسترسل في كل الكلام لحد ما طلعت كل اللي جوايا
ثم ختم النقاش بيننا بأن وجه لي سؤالا وقاللي
أسيبك تفكر وترد عليا بعد أسبوع
....
وبعد أسبوع اتقابلنا وبدأت أناقشه في سؤاله
لحد ما بدأ عمرو يربط بشكل جميل ومبهر بين كل المواضيع والفوكيرات والخويطرات
المكلكعة اللي كلمته فيها قبل كدة
وعرض عليا في نهااااااااااية كلامه حاجة واحدة بس
أظنه قد وصل فيها لأصل المشكلة...ومحور المسألة
وبذرة المنجا
( ومعرفش أيه التشبيه العجيب ده)
لكن...ختمت كلامي معاه بإني قلتله
إنت عارف إنت عملت أيه دلوقتي....أنا بقالي سنة عمال أدور على حاجة ومش شايفها
وانت جيت شاورتلي عليها


تحية لثلاثة

دلوقتي أقدر أقول
إن في 3 أصغر مني ... اتعلمت منهم كتير
عمرو...أحمد...نهلة
وسبحان الله إن التلاتة كانوا في نفس العام
غير أني أدين لهم بالفضل أن الله عز وجل قد علمني بهم الكثير
فجزاكم الله عني خيرا أيها التلاتة


فضيلة التفكير

بعد هذه التجربة الممتعة
أدعو بني جلدتي من أبناء آدم وبناته
أن يستخدموا فضيلة التفكير
وألا يضعوا القيود على عقولهم التي وهبها الله لهم
وألا يترددوا أو يتراجعوا عن إعادة النظر في أي من الأمور من حولهم
حتى وإن كانوا قد اعتادوها بشكلها التي هي عليه
فكروا...ومتقلقوش
فكروا...ومتخافوش
فكروا...ومتترددوش
فكروا...ومتسكتوش
تفكروا في خلق الله
ولا تفكروا في الله
فإنكم لن تقدروه قدره


فحتى حينما حظر رسول الله التفكير في شيء واحد
هو ذات الله وماهيتها وكنهها
وضّح لعباد الله الحكمة من هذا الحظر
أن البشر بطبيعتهم وطبيعة عقولهم
لم تمنح القدرة على استيعاب ماهية الذات الإلهية
وكأن من يحاول استيعاب ذات الله بعقله
كمن يحاول أن يضع ماء البحر كله في زجاجة صغيرة
فتفكروا في كل ما حولكم
"إن في ذلك لعبرة لأولي الأبصار"

هناك 11 تعليقًا:

نهلة محمود يقول...

بسم الله الرحمن الرحيم
بعد الصلاة والسلام على النبي الكريم
السلام عليكم ورحمة الله وبركاته

طيب احنا ممكن نقول عليه فعلا عام التفكير........ممكن أقول بالنسبة لي أن في بداية العام الواحد كان مبهور بحياة الجامعة ومتخيل أن المفروض ناخد راحة من كل حاجة التفكير والمذاكرة وكل حاجة إلا الراحة
.................
لكن لا أنكر أنه بعد انتهاء الفصل الدراسي الأول وبعدرؤيتي لمجموعة مختلفة من البشر تماما عن التي كنت أقابل
ناس بتعمل كل حاجة لوجه الله سبحانه وتعالى

خالصة لهذا الوجه الكريم
ياااااااااااااااه
محاضرات.....معلومات......الاهتمام بالمناقشات ونشر العلم بيننا.........
ربنا يكرمكم
ابتديت اقف وقفة مع نفسي أني لازم أنضم بفضل الله ورحمته لهذا الجيل الصاعد الذي سيغير مصير أمته الحال إن شاء الله
ويدفع بها في عجلات التطور

ولو تسمح لي اضيف اضافة صغيرة أن كلنا ربنا أكرمنا بأن نتعلم من بعضنا البعض
فلكل من هذه الدفعة العظيمة ما يميزه
ولو على الناس اللي أثرت فينا فهما كتير جدا
وربما يمر عليك شخص في حياتك يلقي إليك كلمة وأنت لا تعرفه
ولكن يجعل الله سبحانه وتعالى هذه الكلمة سببا في تغيير مسار حياتك

وسنكون إن شاء الله سببا في تغيير حال أمتنا إلى الإفضل إن شاء الله
ولنعلم دائما أن الله سبحانه وتعالى يكون مع المسلمين الأقوياء المجتمعين وليسوا الضعفاء المتفرقين كما هي حال أمتنا

وجزاك الله خيرا وكل الدفعة بتاعتنا بل وكل دفعات كليتنا العظيمة إن شاء الله

والسلام عليكم ورحمة الله وبركاته

صرخة الأقصى يقول...

السلام عليكم ورحمة الله وبركاته

تدوينة ما شاء الله والكلام جميل موزون كده وتمام أوي بس المشكلة في هذه التدوينة
انها عايزة تتفك شفرتها لكن مش مهم الحمد لله خييييييييير خييييييييير ان شاء الله

عايزة بس أقول أنا كمان العام الماضي اتعلمت من ناااس كتير واتعرفت على شخصيات بجد رائعةونهلة محمود أحد الشخصيات دي وبجد أنا بحبها وبمووووووووت فيهاوكمان الدفعة دي دفعة جامدة جدا
وان شاء الله
ربنا ينفع بيها أمتنا

وعام دراسي سعيد ان شاء الله

kholod يقول...

طيب .. الحمد لله

وفعلا .. انا كمان استفدت من الدفعة

دى حاجات كتيييييير اوى

ربنا يوفقنا جميعا

هبة مدكور يقول...

انا كمان استفدت جامد واتعرفت على ناس حلوين اوى اوى

امواج التغيير يقول...

الموجة الأولي
علمانية الادارة .. هل هي ما نريد
http://2mwag.blogspot.com/
تفضل بزيارتنا وشاركنا بالرأي

مدونة : أمواج في بحر التغيير

عبدو بن خلدون يقول...



مازي
يا
قلة
القلل

عمرو طموح يقول...

رفحت... أنا مستني التدوينة التانية
:P

بس عندي ليك خاطرة...

أيها الإعلامي مخوخ العقلية.. أخي الزبيب .. تبا ليك

بس كده..

هش

محمد رفعت يقول...

السلام عليكم ورحمة الله وبركاته

إزيكم يا بشر؟؟

أخبار رمضان والعشر الأواخر؟؟

........

نهلة

جزيتي خيرا على الرد والتعليق
ما ذكرتي عن إن كلنا اتعلمنا من بعض فعلا حقيقة
وسبحان الله
الإنسنا يظل يتعلم مدى حياته
الواحد ساعات بيحس إنه كبر على التعلم
أو إن كل اللي حواليه أصغر سنا وبالتالي خبرة أو تجربة
وبيظن إن هو صاحب الحق

وعلشان كدة ربنا بيضع امام الفرد نماذج تانية بيتعلم منها كتير
حتى لو كان يظن إنه صاحب الحق وحده
أو صاحب الفكرة وحده

فالحمدلله

......

صرخة الأقصى

جزيتي خيرا على المرور والتعليق
وربنا يكرمنا وينفع بينا
ويجعلنا سبب في نصرة دينه

.......

خلود

جزيتي خيرا على المرور والحمد لله على الاستفادة
وإن شاء الله خلال السنة دي وما بعدها تكون الاستفادة أعظم كتير بإذن الله

...


هبة مدكور

جزيتي خيرا على تعليقك ومرورك بعد فترة انقطاع

.......

عمي الكبير

الطبيب مصطفى
يعني الراجل المهم
يعني طب الأسنان كله
يعني الفن واللحن والكلمات
يعني اسكندرية ورجالتها

كل ده
بس برضه دخلت عملت إعلان عن مدونتك بعد ما بقيت مشهور والجرايد اتكلمت عنك وعن مدونتك

افتكرتك داخل تزمرلي عالمطب يا راجل

........


عبدو بن خلدون

إزيك ياض يا عجيب الأطوار
على فكرة ياض
انت عندك والله - مباديء عبقرية-
بس مش بتبان نظرا للتهييس وطبيعتك العجيبة الغريبة
التي تميز المجتمعات الشهيرة
في بعض الدول العجيبة
بدون ذكر أسماء
مصر طبعا
على رأيك

ويلا ياقلة
هش
...........

عمرو طموح

الشاب اللي عامل فيها تقيل
وداخل يعلق ىخر واحد بقى وعاش في دور النجم
بعد ما عملت عليه تدوينة وبتاع

انت صدقت إنى هعمل عليك تدوينة تانية
ده انت فعلا طموح يا بني
بلاش تاخد قلم في نفسك

أحسن مرة واحد خد في نفسه قلم طلع براية

يلا سلام

غير معرف يقول...

السلام عليكم
بعد فترة انقطاع كبيييييييييييرة واى رجعت تانى علشان اعلق على المدونة التحفة دى ودى حاجة مش جديدة عليك
انا مش هضيف حاجة جديدة غير انى فعلا استفدت منكم كتير جدا ومن ناس تانية استفدت حاجات مكنتش اعرفها قبل كدة نهائيا حاجات ضافتلى حقيقى كتير جدا فى حياتى وربنا يجزيكم كل خير يا احلى دفعة 2010
هــــــــــــــدى زكريــــــــــا

منة النادري يقول...

انا عايزة اعلق على حاجة واحدة بس

انا كنت دايما قبل ما ادخل الكلية بدعي ربنا انه يرزقنى الصحبة الصالحة في الكلية

فبجد الحمد لله ليك يا رب

ان بجد دفعتنا دي دفعة رائعة انا
مندهشة اوى بجد اننا كلنا متفقين

الحمد لله مع بعض

كلنا عايزين نعمل حاجة تفيد الاسلام كلنا بنحب الخير اوى كلنا عايزين نعمل حاجة

اعتقد اننا فعلا ربنا جممعنا عشان في حاجة مفروض نعملها

انتو بجد الدفعة دى انتو اللى ادتوني الامل في ان الاعلام بجد هيتغير على ايدينا

بجد انا بقى عندى يقين اننا هنعمل تغيير

في الاعلام ان شاء الله

فبجد الحمد لله احنا دفعة نشيطة اوى الحمد لله وطيبة اوى وبتساعد بعضها

Sanaa basha يقول...

هى الفكرة فى شفرة
تتفك
من زاوية معينة
لو مش شفتها
لازم تلبس نظارة
لو برضه مش شفتها
احكيها واوصفها
ولو غيرك شافها
خدها منه واحتفظ بيها عندك
عارف الأنتيفايروس لما يحفظ توقيعات الفيرسات عشان لما تدخل الجهاز يقوم قافشها
خد الحكمة كوبى بيست من الانتيفايروس على دماغك
ويا رب سعادتى وسعادتكم نعرف نعملها بنفس اللياقة الرقمية للبتاع اللى اسمه نورتون سيمانتيك انتي بتاع كده
دمتم