الاثنين، 7 أبريل 2008

ري كوووووووز...يا عبدو






مش عارف ليه...

أيه اللي خلاني دلوقتي افتكره !! , او يمكن عارف بس عامل فيها تامر
بقالي كام يوم مش بفكر غير فيه وفيها وفي المذاكرة وفي مصر
كل يوم قبل ما أنام سامع كلامه بيهمس في وداني
كل ما باجي نازل أصلي أو رايح الكلية أو قاعد اتغدى أو فاتح الكتاب أو داخل جوة ..بفتكر كلمتين حلوين من حنكه

المهم
إنه في بالي على طول, مع إنه كان زمان بحسه عيل مالوش لازمة كدة وعامل زي يوم الأربع (على رأي رفعت اللي هو أبويا)
بس دلوقتي هو حاجة ضوخمة في حياتي وجزء لا يتجزأ إطلاقا من الأي حاجة

اترميت على السرير اللي في ركن الأودة
وبينما كنت أغوص في خوطرات تفكيري, إذ أخذني الشوق إليه وداعبتني نفسي وداعبتها (حاجة من ريحة إيحاءات صاصا)
وقررت بيني وبين نفسيتي إني أقوم دلوقتي أقرا كل تدويناته
تخيلوا..!!!
قررت أقرا النجوم كلها علشان استكشف هو ليه مسيطر عليا بالشكل ده في الوقت ده
بالرغم من إن عندي الصبح (يعني كمان 8 ساعات مثلا) امتحانين midterm كل فردة فيهم بـ30 درجة


قمت من السرير (اللي كنت رميت نفسي عليه من شوية) وقعدت عالمكنة العتيقة بتاعتي
وضربت عنوان النجوم....وفتحت النجوم القديمة أتصفحها واحدة تلو الأخرى



وانا بدور في عمق النجوم
لقيت عدد واحد تدوينة عجيبة جدا...جدا.. أعجب من حسام خاطر نفسه
كنت قريتها زماااااااان....بس نسيتها
بس أول ما شفت عنوانها...ضحكت طحن وقررت أفتحها اقراها من جديد

كووووووووز

كان ده عنوانها اللي عبدون منحها إياه لما قرر يكتبها
كانت كتبها بعد ما سمع إن العبد لله ( ده مصطلح عربي معناه إني أقصد نفسي بس مش عايز أقول كلمة انا تواضعا وكدة)

المهم
كان كاتبها زمااااان لما سمع إن العبد لله (أنا يعني) جاب امتياز وطلع التاني عالدفعة (لأ ده زمان اعمل عبيط اعمل عبيط)

ولأن عبدون كان من الناس اللي بيسموهم رفقاء الطيفولة وكان معايا في المدرسة من واحنا أطشفال
فكان الخبر له في نفسه وقع المش عارف أيه, خاصة أنه يعلم أبعاد وأعماق وأغوار المشكلة المتأصلة بطبيعتها في سيكولوجيات المجتمع المصري

ومن هنا قرر عبدو أن يعلنها امام الجميع وبلا تردد قائلا إياها بملأ فيه

كوووووووووووز


مش عارف ليه يا عبدو لما قريت كووووووز المرة دي نفسيتي تعبت وتملكني الحزن والـ... وكل سنة وانت طيب
في حين إني لما قريتها المرة الأولى كنت في قمة السعادة والفرح والـ...... كل سنة وانت طيب بردو


شيء شبه الحاجات اللي انت بتحطها عندك

يا ترى ليه يا صاحبي؟؟

- ممكن مثلا علشان لما قريتها المرة دي حسيت إنك كاتبها لواحد تاني كنت أعرفه بس دلوقتي معرفوش
- ممكن بردو علشان حسيييت المرة الأولى إنك كنت بتباركلي وتهنيني لما كتبتها, والمرة دي حسيت إنك بتعاتبني
- ممكن كمان علشان حسيت إنك كنت بعيد عني بس كنت بردو واخد بالك مني
- ممكن علشان اتحسرت شوية لما قريت عن "محمد" وحسيت إنه واحشني
- ممكن علشان عادي يعني ليلة امتحان فمخنوق شوية لكن مفيش حاجة وكل المسائل تمام
- ممكن علشان انت بتحاول تقنعني إن كل حاجة (ممكن) وإن كلمة (مش ممكن) هي الشيء الوحيد الـ(مش ممكن) وبرغم كدة الـ(ممكن) ده مش عايز يبقى (ممكن) معايا خالص أو أنا اللي (ممكن) أكون مش عايزه يبقى (ممكن) أو مش متخيل الحاجة اللي طول عمري متأكد إنها مش (ممكن) تبقى (ممكن)...ممكن بردو ليه لأ


المهم يا صاحبي
إنك من حيث دريت أم لم تدري
كووووووووووووووزك
تعبني
أو
لطشني
أو
زود اللي جوايا


وزمن الـ...... خلاص انتهى...محدش فاهم حاجة


هناك 12 تعليقًا:

سمـــر مــاهر يقول...

الله
روح الصداقه دى اجمل من اى حاجه ممكن تحسها فى حياتك

التدوينه خفيفه وجميله
ربنا يبارك فى صداقتكوا

بس الذ حاجه فى الموضوع ان تدوينه
كووووووز
ولا نفر كان ليه وجهه نظر فيها
:D:D

أكرم يعقوب يقول...

أنا ليه حسيت انك انت و بن خلدون مش هاتشوفو بعض تانى حسيت انكم خلاص كل اللى بينكم انتهى....؟؟!



أكرم العوضى

عبدو بن خلدون يقول...

حبيبي

أنا واثق أنك تقدر
فتش عن ذاتك
أخرج من أعماقك
لترى الدنيا علي حقيقتها

ولتعلم أنك
إذا ظننت أنك تقدر
أو أنك لا تقدر
فأنت غالبا علي حق

فاختر لنفسك

فما الحياة إلا اختيار
وما الحياة إلا اختبار

وافتكر يا جميل اللي قلناه النهارده

والذين

جاهدوا

فينا

لنهدينهم

سبلنا

افتكر الخمس حاجات

إنت تقدر

بعد عشرين عاما من الآن لن نندم علي الأشياء التي فعلناها...

بل علي تلك التي لم نفعلها!

فارم مجاديفك في عرض البحر، وأطلق أشرعتك... وانطلق واحلم وغامر

لأنك تقدر
ولأن الله يريدك أن تفعلها
ولأن في كل مجتمع جراح يجب أن تداوى، ودموع يجب أن تواسى... وفي قلبك قدرة علي فعل ذلك
ولأن الحياة تريدك أن تحقق أسطورتك الذاتية
ولأن فرص النجاح كالحافلات... فهناك واحدة دائما قادمة علي الطريق... حتما!

ركز علي قدراتك بدلا من التفكير في القيود التي تحد من انطلاقانك

واعلم أن
النور يخترق الظلام
أما الأمل
فيخترق كل شيء

بحبك

هذا ليس تعليق

وإنما لتعلم

أن الجواب هو ما تراه من نفسك لا ما تسمعه مني

إلي لقاء

محمد رفعت يقول...

سمر

يا فندم
ربنا يكرمك
لكن
دي مش روح الصداقة
دي حاجة كدة مش بتتشاف
هي بتتشم بس
:)

أم عن وجهات النظر
فده يرجع أكيد لقوة وعنف وتأثير التدوينة
لدرجة إن الناس حصلها حالة من الشلل التعليقى لما شافت تدوينة على (العبدلله)
فمحدش قدر يرد من هول الـ...
كل سنة وحضراتكم طيبين

..........

أكرم العوضي
سيبك انت
أهم حاجة إني رجعت أشوف اسمك مطرقع
وده دليل أنك حي ترزق بالرغم من ابتلاءات الثانوية وآلامها

بص
يمكن انت قريت التدوينة غلط
بس مش اللي بينا هو اللي انتهى

لكن اللي انتهى
هو زمن الـ... خلاص

محدش فاهم حاجة

..........

عبدون

:)

بس كدة

عمرو طموح يقول...


يا الله

كدت أبكي بجد....

مكنتش فاهم أنا ليه في وسط ورشة العمل طلعت الموبايل النهاردة و قررت إني أبعتلك الرسالة...

بس دلوقتي .. عرفت...

"محمد"... انت بجد وحشتني... وحشني محمد اللي انت كنت تعرفه.. و أنا كنت أعرفه.. و ناس كتير كانوا يعرفوه... و بس... وحشتني... ببساطة.. عشان بحبك

لي تعليق أخير...

عبدو قال في تعليقه: النور يخترق الظلام

و أنا أذكرك: الله نور السماوات و الأرض

و عبدو قال أيضا: الأمل يخترق كل شيء

و أنا أذكرك أيضا: و لا تيئسوا من روح الله إنه لا ييئس من روح الله إلا القوم الكافرون

ملأ الله قلبك بالرضا.. و دربك بالهدي.. و أنار بنوره بصيرتك.. و شغلك بالحق حيث كنت

و حاجة محشورة جوايا بقالها كتير

و الله العظيم

و الله العظيم

و الله العظيم

إني أحبك في الله

سمعتها؟

خليها ترن في ودنك بأه

إلي أن ألقاك..

السلام عليك

غير معرف يقول...

الحمد لله ان ربنا استجاب لدعائى
ان شاء الله هتوصل وهتكون طالما انت عايز تكون..ربنا يوفقك...

غير معرف يقول...

بالرغم من إني من أكتر الناس متابعة لتوينك ...

إذا ما كنتش أكثرهم على الإطلاق بحكم قربي منك ..

فأنا بضم صوتي للصوت القائل ..

وحشتنا فعلا " محمد بتاع زمان " ..

تدوينة مؤثرة بجد ..

هزتني عاطفيا D:

محمد رفعت يقول...

طب اكتبي إنك رضوى أختي يا ظريفة
علشان انا مش ناقص كلام كتير
أحسن في ناس ما بتصدق

وتقولك هزتني عاطفيا وبتاع

ناقصك انا
:S

غير معرف يقول...

ارحمني يعني أمة لا إله إلا الله عارفة إن أختك اسمها رضوى ..

هو أنت خليت حاجة إلا لما قلت فيها أختى رضوى وطنط منى ورفعت أبويا ..

خليني ساكتة .. D:

مصطفي النجار يقول...

يعني خنقت رضوي
وخنقت عم رفعت وطنط مني
وخنقت عمك اللي بيكتب الان
وناوي تضيع مستقبله في كلية الاعلام
وشكلك غيران منه عشان هو طالع الاول علي الدفعة وعشان كده مش عايز تروح تسجله التيرم التاني

عموما رغم كل دا
انا بحبك زي ما انت
لو رفعت شخصيته اتغيرت
مش هيبقي رفعت
فاهمني

الموضوع با ختصار
اي اكل ناقصه شوية ملح
لو يكملوا هيبقي جميل قوي

ومنك لله يا حبيب قلبي

هبة مدكور يقول...

"لو رفعت شخصيته اتغيرت
مش هيبقي رفعت"

فعلا هو ده اللى عايزه اقوله

وانتى يارضوى انا نفسى تيجى الكلية عندنا تانى واشوفك

محمد رفعت يقول...

عمرو عبدالحميد طموح

أخبارك أيه يا وغد الأوغاد

عامل أيه يا اخي ؟؟؟

عدم المؤاخذة أصل الهاتف الخلوي بتاعي واحد استعاره غالبا

فمشفتش الرسالة اللي انت بعتهالي

بس عالعموم
الرسالة وصلت يا برنس وكله تمام التمام

وميك دوعاء فور آس

و
cream on u

........

الراجل اللي مكتبش اسمه في التعليق
حبيبي الكبير
بس انا غالبا عرفتك

إنت الطبيب خالد

شفت
;)
ربنا يكرمك ياباشا
مظبطني إنت بظهر الغيب
:)
ومش عايز تقول علشان كدة وبتاع

........

حبيبي
الراجل الكبير أوي
ضحية التكفير
الرجل القيادي
الإصلاحي
ال.....

انا سجلتلك خلاص يا باشا في الكلية
وعلى فكرة
..

.......

بس خلاص

..............

هبة مدكور

ربنا يكرمك يا فندم عالكلمتين دول

وكدة