الأحد، 3 مايو 2009

الصبر مفـ**ـاخ الفرج




بما إننا بني آدمين..فكتير بتمر علينا أيام كئيبة كآبة السنين
بنحس إن خلاص مفيش بعد كدة..ده الآخر..الآخر اللي هو الآخر
وبما إننا بني آدمين بردو
- نفسي أعرف ليه بنقول بني (آدمين) مع إن المفروض يبقى اسمها أبناء (آدم) - المهم

احنا اتخلقنا كدة..زي ما علمتكم يا ولاد دايما
يوم فوق ويوم تحت, يوم منشكح ويوم مخنوق
يوم فوق ويوم تحت..فروم لاست..من الآخر..مطبات
;)

علشان كدة
لو مجتش علينا مواقف تضحكنا, تكركرنا, تهلكنا ضحك
هيبقى صعب نستحمل

بحس الإنسان ده حاجة حلوة أوي
قادر إنه يتجاوز كل همومه واكتئابه - ولو للحظات- في موقف واحد يخليه يضحك من جوا
:D

ساعات لما بكون زعلان..بحب أفتكر شوية مواقف بتساعدني إني أضحك من جوا
ساعتها بحس إن الدنيا دي ولا تستاهل...إياكش تولع
أهو على قد ما زعلت..على قد ما ضحكت
وملعون أبو الكآبة والاكتئاب
:D

...........

خالد وأيمن

اتنين صحابي كانوا راجعين من امتحان , وكان امتحان كئيب - ملعون ابو الكآبة برد
كانوا بيعدوا الشارع, وخالد بيواسي أيمن ويخفف عنه كآبة الامتحان

خالد بيقول لأيمن: معلش يا أيمن أصبر ولا يهمك..الصبر ((مفشاخ)) الفرج

عدى جنبهم سواق تاكسي..سمعه وهو بيقوله كدة
وشه جاب ألواااااااان

وقاله: (مفشاااخ)؟!!! ..الصبر مفتااااح الفرج
ده قرآآآآآن يا بهااااااايم

:D :D :D
والله حاجة تجيب الكافية

.....

واحد تاني صاحبي بيحكيلي كان راكب اتوبيس

طلع طالب من الطلاب الأفارقة اللي بيدرسوا في الأزهر

فبيقول للكمثري: أريد أن أذهب إلى مدينة البعوث الإسلامية

الكمثري قاله : أيه؟؟؟

قاله : أريد أن اذهب إلى مدينة البعوث الإسلامية

قاله : نعم؟؟؟؟؟

فالولد قاله : مدينة البعوث الإسلامية

الكمثري قاله : أيوا صدق الله العظيم..عايز أيه يعني

:D

عادي بردو
معلوماته العامة إن أي فصحى يبقى قرآن هتكون اغنية سعد الصغير مثلا؟؟

........

واحد صاحبي لطيف اوي

شغال -عدم المؤاخذة- في فودافون
بيقبضوهم المرتب على يوم 28 في الشهر

جه يوم 28 مكانش معاه ولا مليم إلا بعض الجنيهات (إوعى
قالك إشطة يصرفهم ما هو هيقبض وهو نازل
صرف كله مفضلش معاه إلا فلوس توديه ميدان الجيزة وهو ساكن آخر الهرم

والمرتب اتأجل يوم كمان ومبقاش معاه ولا مليم

نزل ميدان الجيزة وهو على باب الله

كان محتاج جنيه يوديه آخر الهرم

قلتله عملت أيه؟؟

قاللي: إشطة أول ما نزلت لقيت ناس واقفة عمالة تقول
موبايل ..موبايل..موبايل
والناس كلها واقفة تتكلم من عندها

رحت مطلع الموبايل من جيبي وأخدت ركن
وقعدت انادي
موباااايل...موباااايل ...موبااايل
هوب عملتلي مكالمتين تلاتة
جبت 3 جنيه
رجت اكلت كشريب 2 جنيه..وركبت بالباقي ميكروباص للبيت

;D
.........


إيكش تولع
وفي الآخر يقولك انا مطرقع

طب والله الناس كلها جواها ذلك الكائن المطرقع
بس امتى يطلع ويبرطع

:D :D

صباح السجع

الدنيا وهمومها أحيانا هي اللي بتفجر الطاقات
الإنسان بيكتشف جواه حاجات عجيبة
حاجات دمها خفيف اوي

مش عارف ايه اللي فتح السيرة دي

قوموا ناموا احسن بلاش تضييع وقت
:)

هناك 6 تعليقات:

عاطف يقول...

ههههههههههه
هو الراجل سواق التاكسي طبعا غلطان لن ده مش قرآن -- بس برضو " الصبر مفتاح الفرج" كلمة حلوة ليه نبوظها بمفشاخ يعني :D

بس عجبني اوي موقف صحبك بتاع موبيل موبيل :loool:

بس ياترى لو مكنش معاه رصيد كان هيعمل ايه ؟؟ :)

غير معرف يقول...

ههههههههه بجد خلتني اضحك من قلبي



بعدين ده قرآن يا بهايم

وصحيح الدنيا ما تستاهلش ف احسن حاجه نضربها طناش
على فكرة البلوج دمها خفيف اوووي

يلا خليني اقوم انام سلاموز

علا هلال يقول...

بجد انت تركيبة عجيبة جدا بس فى رأيى -ودة رأيى انا لوحدى طبعا-ان اللى يعتمد عليك هيكسب كتتتير

entrümpelung wien يقول...

شكرا لكم .. دائما موقفيين ))
entrümpelung
entrümpelung wien

شركات توظيف فى مصر يقول...

دهب أكثر الشركات تميزاً فى مجال توظيف العمالة المصرية بالخارج. لا تعطل عجلة النجاح بشركتك واتصل بشركة دهب لتوفر لك ما تريد. هدفنا هو مساعدتك فى النجاح المستمر لشركتك. نسعى للحصول على ثقتكم ونعمل بجهد لتوفير وقتكم. دهب ، أينما كنت نوفر لك ما تريد من أفضل الكفاءات المصرية.

شركة الحسينى يقول...

الله معكم .. دمتم مبدعيين

هايدلبرج سبيد ماستر
هايدلبرج سبيد ماستر 5 لون
هايدلبرج سبيد ماسترHeidelberg Speedmaster
هايدلبرج سبيد ماسترHeidelberg Speedmaster