الجمعة، 7 مارس 2008

يا مرحب بروح نجاد



وأخيييرا

بعد 7 شهور من بداية
ALMUN 08
تم توزيع أعضاء النموذج لتمثيل الدول المشاركة في النموذج لهذا العام
وتم اختيار سموي -حفظني الله - لتمثيل وفد
(الجمهورية الإسلامية الإيرانية)
في مجلس تنسيق السياسات الخارجية لهذا العام
وبهذا
فمن الآن لا سبيل إلا تقمص روح أحمدي نجاد لمدة حوالى أسبوعين
بداية من اليوم وحتى انتهاء المؤتمر إن شاء الله
والأدهى والأمر
إن نصي التاني
المدعو أحمد شلبي
كان من قسمته ونصيبه
أن يصير ممثل وفد (الولايات المتحدة الأمريكية) في النموذج ذاته
علشان نقطع بعضينا البعض
وخليها على الله



وعلشان اللي مش عارف

الموضوع وما فيه
إن فيه فكرة عبقرية بتتعمل في العيد من الجامعات المصرية كل سنة
وعلى رأسها الجامعة الأمريكية وجامعة القاهرة
والفكرة دي باختصار هي إن
مجموعة من الطلبة بيعملوا نموذج صغنتوت كدة مصغر لأحد المنظمات الدولية أو مش دولية الموجودة على أرض الواقع
زي منظمة الأمم المتحدة
أو جامعة الدول العربية
أو منظمة المؤتمر الإسلامي
أو حاجات كدة تانية كتير



المهم
إن الطلبة بيعملوا نموذج مصغر منهم هما
يحاكي تماما المنظمة الأصلية
بمجالسها ومؤتمراتها السنوية أو الدورية
وبعد تاهيل لأعضاء النموذج على مدى شهور
يتم تقسيم الأعضاء
علشان كل عضو أو اتنين يمثلوا أحد الوفود لأحد الدول
اللي هتكون موجودة في المؤتمر السنوي للمنظمة
أو لنموذج المنظمة


المفيد

اللازمة من الحوار الفاشل ده كله أيه بقى يا بشر
؟؟؟
إن يتم تأهيل الطلبة اللي لسة بيدرسوا في الجامعة
ويتم توعيتهم بأحداث المنطقة أو المجتمع الدولي حواليهم
ووضع المشاكل الدولية قدامهم وبين إيديهم
علشان هما بنفسهم يحاولوا يضعوا لها الحلول مع بعض في المؤتمر السنوي
والخروج من المؤتمر بمشروع قرار لحل أحد هذه المشكلات الكبرى
وبكدة
يتعود البرنجل أو البرنجلة اللي لسة في الجامعة
على القيام بمهمة لا يقوم بها إلا صناع القرار في الحكومات
ويكتسبوا مهارات تفاوضية ويحصلهم - لا مؤاخذة - توعية سياسية بالواقع من حواليهم
وبالتالي
نلاقي عندنا وشوش تنفع تشيل مسؤوليات بعد كدة
ومناظر نضيفة تعرف تمثل بلادنا في المحافل الدولية المحترمة
وناس اتربوا من زمان على المهارات الأساسية اللي تلزم أسياسي أو حتى أي واحد
ناوي يبقى حاجة نضيفة بعد كدة


عبأري

أنا عن نفسي معرفش مين أول طالب ابتكر الفكرة دي
بس اللي اعرفه إن الفكرة دي بدأت في جامعات الولايات المتحدة قبل ما تجيلنا إحنا هنا مصر
لكن مش مهم هو مين أوي على قد ما المهم
إن الشاب ده كان مان عبأري
مبتكر مبدع
فكر في فكرة عبأرية انتشرت حوالين العالم كله
ودلوقتي ليها تأثير كبير أوي على أعداد كبيرة جدا من طلبة الجامعات على مستوى العالموبردو أكيد ربنا ما خلقش العالم هناك في أمريكا بتعرف تفكر وخلقني خرتيت
أكيد الناس هنا لو شغلت مخها هتفكر وتطلع أفكار مبدعة كتير ممكن يكون ليها صدى كتير
بس مش عارف الناس هنا مالها كدة تفكيرها غالبا بيبقى جوة البتاع
ويوم ما يضرب بالطالب الطموح يقرر يرشح نفسه في البتاع المهلهل الخربان
اللي اسمه
اتحاد الطلبة
لأ وخناقات بقى عليه ومظاهرات وشطب وحوارات
لأ وأيه
كمان لما يقفلوهولهم
يقوموا عاملين عدد واحد مهلهل خربان تاني
بس يسموه البتاع الحر
بدل البتاع العادي
وكأن منابع التفكير خلاص جفت واتشفطت وطلع عين اللي خلفوها


عزومة بقى قبل ما نمشي

المهم
إن البشر معزومين على حفل افتتاح النموج
يوم 18 مارس إن شاء الله
ولسة معرفش فين ولا الساعة كام هقولوكوا قبلها إن شاء الله
وتمنوا لنا حظا موفقا
ونسألكم الدعاء

هناك 12 تعليقًا:

صرخة الأقصى يقول...

محمد رفعت

رئيس الوفد الايراني بنموذج

جامعة الدول العربيــــة

السلام عليك


الحمد لله المدونة رجعت زي زمان وبقي فيها مواضيع وكده

يلا دووووووووس بقي وعيش الدور بتاع نجاد كويس وتقمص كده

ربنا معاك يا أستاذي

محمد رفعت يقول...

صرخة الأقصى..
رئيسة لجنة ستويو في جيان
وعضو
MOIC OC
وعليكي سلام الله
ربنا يكرمك على المرور
ولا تنسوا الحضور يوم افتتاح المؤتمر
18 مارس إن شاء الله

Nahla Abdul Rahman يقول...

بسم الله الرحمن الرحيم
اللهم صلي على محمد وعلى آل محمد كما صليت على إبراهيم وعلى آل إبراهيم
السلام عليكم ورحمة الله وبركاته
ــــــــــــــــــــــــــــــــ

يعني كل واحد فيكم هيتحدث عن الوفد اللي بيمثله من وجهة نظره وآرائه الخاصة (آراء الدولة اللي بيمثلها يعني)
إن شاء الله
إذا كان كده

انا متخيلة المشهد

بين محمد رفعت واحمد شلبي

ربنا معاكم

عايزنها حرب

هههههه

محمد رفعت يقول...

أها
بالظبط كد
مش مسموح لحد إنه يتكلم من وجهة ظره الشخصية أو يتفاوض ويتناقش من الناحية دي
لازم يلبس دور الدولة اللي هو بيمثلها
ويتكلم بلسان رئيسها

.........

أنا طلبت منهم آخد مصر علشان ابقى مرتاح
كان زماني أي حاجة تحصل أرد رد واحد
انا ماليش دعوة
أنا كلتهم كذا مرة وحذرتهم ومحدش سمع كلامي
وقلتلهم إن الوضع خطير وإن الموضوع كدة خرج من إيدي
وأنا ماليش أعداء
كل الناس أصدقاء
وسلملي عالبرنس نجم امبابة
.......

فربنا يستر
إنتوا عارفين أحمد شلبي ده تنين سياسي
واللي يقف قدامه يتبعتر
:)
ه غير غن معاه حق فيتو
وكمان أقوى جيش في العالم
ونفوذ مؤثر على أغلب الدول الموجودة
وربنا يستر

غير معرف يقول...

السلام عليكم ورحمة الله وبركاته
فكرة حلوة اوى حكاية النموذج ده يالا ربنا يوفقكم ويبقى نموذج على اعلى مستوى بس حضروا نفسكوا كويس الاول وربنا معاكوا
وبجد يا ريت لو ينفع اى حد يحضر وكمان يكون الميعاد بتاعها بدرى ويكون فى الجامعة مثلا علشان اللى ينفع يروح
"سلمى"

غير معرف يقول...

ماشاء الله ..ماشاء الله

أيه الحاجات اجامدة دى

ربنا يوفقكم دايما والله المستعان

وان شاء الله هحضر العزومة دى:)

منال(siko)

دهاء سياسي يقول...

السلام عليكم ورحمة الله و بركاته

كنت داخله أكمل تعقيب على تدوينتك الى فاتت كما وعدت لقيت هذه التدوينة المبهجة فكان لازم أعدى هنا الاول

مبروووك على ايران .. أول مرة أعرف انك معانا فى ألمن .. انا برده كنت مستغربه لما شفتك الجمعة الى فاتت الصبح ..

باذن الله كل المجالس تعمل شغل كويس السنة دى و باذن الله برضه نسمة تظبطكم كلكم فى الكونفيرينس :P

سؤال برىء قبل ما أمشى بس .. قرأت هنا فى التدوينة لفظ جديد نوفى على مسامعى الكريمة و هو : برنجل / برنجلة
ده يطلع ايه بالظبط ؟؟ و طلع امتى ؟؟ و ايه حيثيات موقفه تفصيلا من فضلك :)

Ahmed El-Agouz يقول...

فكرة حلوة يا ابن رفعت
ربنا يوفقكم...
يا باشا...

محمد رفعت يقول...

سلمى
جزيتي خيرا على مرورك
وبالنسبة للمؤتمر
الافتتاح بتاعه بس هو اللي بيبقى مفتوح الحضور لكل الناس
وده هيبقى يوم 18 مارس إن شاء الله
يعني الأربعاء مش اللي جاي اللي بعده
وغالبا بردو لسة مش أكيد
هيكون في قاعة المؤتمرات بمدينة الطلبة
اللي قدام باب تجارة
وبردو لم المعاد والمكان يتأكد
هقولوكوا إن شاء الله
.....

منال
ربنا يكرمك على مرورك بالمطب الأخير
والدعوة مفتوحة إن شاء الله
....

دهاء

انا في
ALMUN
تنسيق سياسات خارجية
بس مكنتش باجي كل الـ
sessions
علشان كدة مش دايما كنت موجود
أصلي اتقلشت من
MOIC
فحسيت إن منظري وحش
فقلت معديش الترم منغير ما ارشق في نموذج تاني
إذ أني مرتبط بموضوع النماذج ده من ساعة ما دخلت هندسة أول سنة
بس المرة دي هي أول مرة أكمل النموذج لحد المؤتمر
كل مرة كنت بحضر كام مرة وانفض

أما عن مصطلح البرنجل
فهو مصطلح دسيس على اللغة العربية
حيث إن اللفظ هو لفظ تركي
وكلمة (برنجل) في التركية
تعني (الأول)
مثل كلمة (بريمو) بالطليانية
ولكنها تستخدم في الأدراج المصرية للدلالة على إن ده شاب أو بنت جامدين
أو ما شابه

......

عجوز

أحبك لما توجز كدة في الكلام وتصبح وتمشي
منغير ما تشتمني وتهزأني عالصور اللي بحطها
:D

momken يقول...

حضرتك تقصد احمدى نجاد السياسى ولا المسلم ولا الشيعى

دول شخصيات تختلف اختلاف كلى وجزئى

اتمنى انك تلم بكل جوانب الشخصيه وان تنسى الشكل الذى يظهر به نجاد فى الاعلام والصور

وان تكون شخصيتك بتمثل نجاد فى كل الجوانب السلبيه والايجابيه
بالتوفيق

تحياتى

محمد رفعت يقول...

أخ ممكن

ربنا يتقبل منك يا أخي ويقوي إيمانك

غير معرف يقول...

Did u saw that post man
I hope u take it into account